अनिल परियार हत्याका आरोपित चार जनालाई जन्मकैदको माग
भरतपुर : जगर ठाडा मगर। भरतपुर महानगरपालिका–१२ का २८ वर्षीय अनिल परियार (कान)को हत्यासम्बन्धी मुद्दामा वकिलहरुले बहस थालेका छन् । सोमबार बहस गर्दै जिल्ला न्यायाधिवक्ता महेश खत्रीले जन्मकैद र क्षतिपूर्तिको माग गरे । हत्या गरेको आरोप लागेका अजय सिंह भन्ने अशोक भण्डारी (फरार), मार्न निर्देशन दिने हेमन्त बास्तोला (पक्राउ), तिलक गैरे (फरार) र मृतकको भाइ राहुल परियार भन्ने सुनिल राउत (पक्राउ) लाई जन्मकैद सजाय मागदाबी रहेको न्यायाधिवक्ता खत्रीले जानकारी दिए ।
यस घटनामा कानको हत्या गर्न निर्देशन दिएको आरोप लागेका विक्रम भन्ने रोहित सिलवाल (पक्राउ) र सुशान्त उप्रेती (फरार)लाई जन्मकैदको आधा सजाय हुने माग गरिएको छ । घटना भएको एक महिनापछि जेठ २४ गते बास्तोला, सिलवाल र राउत पक्राउ परेका थिए । अन्य ३ जना अझै फरार छन् । मृतकको दाइ सागर परियारले दिएको किटानी जाहेरीका आधारमा उनीहरु पक्राउ परेको प्रहरीको भनाइ छ ।
भरतपुर महानगरपालिका–७ स्थित कृष्णपुर खेल मैदाननजिकै वैशाख २५ गते राति ७ः३० बजेको समयमा अज्ञात समूहले परियारलाई हतियार प्रयोग गरी हत्या गरेको चितवन प्रहरीले जनाएको छ ।
