महेश सिंह लहान २५ असोज । नेपाल-भारत खुला सीमा क्षेत्रमा हुने अवैध कारोबार तथा सीमा सम्बन्धी समस्या समाधानका लागि सिरहाको नवराजपुरमा सीमा सहजीकरण अन्तरक्रिया कार्यक्रम सम्पन्न भएको छ।
सशस्त्र प्रहरी बल नेपाल बोर्डर आउट पोष्ट (बिओपी) नवराजपुर र सीमा प्रहरी चौकी झाझपट्टीको आयोजनामा उक्त कार्यक्रम सम्पन्न भएको हो।
कार्यक्रममा सशस्त्र प्रहरी बल नेपाल बिओपी नवराजपुरका प्रमुख प्रहरी निरीक्षक सन्दिप केसी, झाझपट्टी सीमा प्रहरी चौकीका प्रमुख प्रहरी नायब निरीक्षक डम्बर दियाली तथा नवराजपुर गाउँपालिका-५ का वडाध्यक्ष जय प्रकाश यादव लगायत स्थानीय जनप्रतिनिधि, नागरिक समाजका प्रतिनिधि र सरोकारवालाहरूको सहभागिता रहेको थियो।
सो अवसरमा सशस्त्र प्रहरी निरीक्षक केसीले खुला सीमाको फाइदा उठाउँदै हुने तस्करी, आपराधिक गतिविधि तथा अवैध ओसारपसार नियन्त्रण गर्न स्थानीय स्तरको सहकार्य महत्त्वपूर्ण हुने बताउनुभयो। सीमा सुरक्षालाई थप चुस्त बनाउन नागरिक र सुरक्षा निकायबीच निरन्तर समन्वय हुनुपर्नेमा उहाँले जोड दिनुभयो।
वडाध्यक्ष यादवले सीमा क्षेत्रको शान्ति सुरक्षा कायम राख्न तथा सम्भावित अवैध गतिविधि रोक्न स्थानीय सरकारका तर्फबाट पूर्ण सहयोग रहने प्रतिबद्धता व्यक्त गर्नुभयो।
सीमा क्षेत्रमा हुनसक्ने सम्भावित अपराध नियन्त्रण र सूचना आदानप्रदानलाई सहज बनाउने उद्देश्यले प्रत्येक महिनाको दुई पटक स्थानीय जनप्रतिनिधि तथा सरोकारवालाहरूसँग नियमित रूपमा यस्ता अन्तरक्रिया कार्यक्रम सञ्चालन गरिँदै आएको सशस्त्र प्रहरीले जनाएको छ।
