महेश सिंह लहान सिरहा – सिरहाको लहान नगरपालिका–१५ स्थित हात्तीदहमा राष्ट्रसेवक बचत तथा ऋण सहकारी संस्था लिमिटेड, लहानको वार्षिक साधारण सभा तथा वनभोज कार्यक्रम भव्य रूपमा सम्पन्न भएको छ। “एकको लागि सबै र सबैका लागि एक” भन्ने मूल नाराका साथ आयोजित कार्यक्रम पुष २७ गते आइतबार सम्पन्न भएको हो।
संस्थाका अध्यक्ष रञ्जित कुमार यादवको अध्यक्षतामा सुरु भएको कार्यक्रममा नेपाल कम्युनिस्ट पार्टी (एमाले) सिरहाका जिल्ला अध्यक्ष अशोक यादव प्रमुख अतिथिका रूपमा सहभागी हुनुहुन्थ्यो। कार्यक्रममा विभिन्न संघ–संस्थामा आबद्ध कर्मचारीहरूको उल्लेख्य उपस्थिति रहेको आयोजकले जनाएको छ।
लहान नगरपालिका–८ मा रहेको उक्त सहकारीमा हाल २५६ जना शेयर सदस्य आबद्ध छन् भने सहकारीको चालु पूँजी ६५ लाख रुपैयाँ रहेको छ। सहकारीले बिना धितो ऋण लगानी गर्दै आएको र कर्मचारी सञ्चय कोषभन्दा कम, करिब ६६ प्रतिशत ब्याजदरमा ऋण लगानी गर्दै आएको अध्यक्ष यादवले जानकारी दिनुभयो।
२०६७ सालमा स्थापना भएको राष्ट्रसेवक बचत तथा ऋण सहकारी संस्था लिमिटेडले हाल देशका ६८ जिल्लामा शाखा विस्तार गरिसकेको र ६ अर्ब रुपैयाँभन्दा बढीको कारोबार गर्दै आएको पनि उहाँले बताउनुभयो।
कार्यक्रमलाई सम्बोधन गर्दै प्रमुख अतिथि अशोक यादवले देशलाई आर्थिक रूपमा समृद्ध बनाउने हो भने हरेक नागरिकलाई सहकारीसँग जोड्नु आवश्यक रहेको बताउनुभयो। पैसा कमाउनु मात्र ठूलो कुरा नभई बचत गर्ने बानीको विकास हरेक व्यक्तिमा हुनुपर्ने उल्लेख गर्दै उहाँले बचत संस्कृतिले नै देशको आर्थिक विकास र समृद्धिमा टेवा पुग्ने धारणा राख्नुभयो।
कार्यक्रम राष्ट्रसेवक बचत तथा ऋण सहकारी संस्था लि. लहान, सिरहा तथा नेपाल निजामती कर्मचारी संगठन, जिल्ला कार्य समिति सिरहाको आयोजनामा सम्पन्न भएको हो।
