महेश सिंह लहान सिरहा,-आगामी फाल्गुण २१ गते हुने प्रतिनिधि सभा निर्वाचनका लागि सिरहा निर्वाचन क्षेत्र नम्बर–१ बाट स्वतन्त्र उम्मेदवारका रूपमा सन्तोष गिरी सिलवाल चुनावी मैदानमा उत्रिएका छन्। स्वर्गीय सामाजिक चिन्तक तथा बौद्धिक नेता प्रदीप गिरीका एक्ला छोरा गिरीले विचारको राजनीतिलाई केन्द्रमा राख्दै उम्मेदवारी दिएका हुन्।
राजनीतिक पृष्ठभूमि र अनुभव बोकेका युवा उम्मेदवार गिरीले परम्परागत शैलीभन्दा फरक सोच र सिद्धान्तका साथ निर्वाचनमा होमिएको बताएका छन्। उनले आफू पद वा सत्ताको लागि नभई राजनीतिक संस्कार र वैचारिक स्पष्टताको अभ्यासका लागि मैदानमा आएको धारणा सार्वजनिक गर्दै आएका छन्।
हाल उनी घरदैलो कार्यक्रममार्फत मतदातासँग प्रत्यक्ष भेटघाटमा व्यस्त छन्। गाउँ–गाउँ पुगेर मत माग्दै जनताको समस्या, अपेक्षा र सुझाव सुन्ने अभियानलाई तीव्रता दिएका छन्। स्थानीय तहमा शिक्षा, स्वास्थ्य, रोजगारी र सुशासनका मुद्दालाई प्राथमिकतामा राख्ने प्रतिबद्धता उनले व्यक्त गरेका छन्।
स्थानीय बासिन्दाहरूबीच गिरीप्रति सकारात्मक चासो देखिएको छ। युवापुस्तालाई प्रतिनिधित्व गर्ने उम्मेदवारका रूपमा उनलाई हेर्ने मतदाताको संख्या बढ्दो रहेको बताइन्छ। विचार र सिद्धान्तमा आधारित राजनीति आवश्यक रहेको उल्लेख गर्दै समर्थकहरू उनलाई बलियो र सक्षम उम्मेदवारका रूपमा प्रस्तुत गरिरहेका छन्।
स्वतन्त्र उम्मेदवारका रूपमा प्रतिस्पर्धामा उत्रिएका गिरीले दलगत घेराभन्दा माथि उठेर समग्र क्षेत्रको विकास र राजनीतिक संस्कार निर्माणलाई आफ्नो प्रमुख एजेण्डा बनाएका छन्। निर्वाचन नजिकिँदै जाँदा सिरहा–१ मा उनको सक्रियता र चुनावी माहोल थप चासोको विषय बनेको छ।
