महेश सिंह लहान सिरहा – सिरहा निर्वाचन क्षेत्र नम्बर–२ अन्तर्गत बरियारपट्टी गाउँपालिका–खोकसीमा नेपाली काङ्ग्रेस समर्थकहरूको बाक्लो उपस्थितिमा विशाल चुनावी सभा सम्पन्न भएको छ। कार्यक्रममा हजारौं कार्यकर्ता तथा शुभेच्छुकहरूको सहभागिता रहेको आयोजकले जनाएको छ।
सभालाई सम्बोधन गर्दै सिरहा–२ का उम्मेदवार राम चन्द्र यादव ले आफू किसानको छोरा र संघर्षशील नेताका रूपमा जनताको सेवामा समर्पित रहेको उल्लेख गरे। उनले देशको हरेक ऐतिहासिक कालखण्डमा काङ्ग्रेसले नै नेतृत्वदायी भूमिका खेलेको दाबी गर्दै मुलुकलाई संकटबाट बाहिर निकाल्न सक्षम शक्ति काङ्ग्रेस नै रहेको बताए।
उम्मेदवार यादवले राणा र राजतन्त्र अन्त्यदेखि लोकतान्त्रिक व्यवस्था स्थापना सम्मको आन्दोलनमा काङ्ग्रेसको भूमिका स्मरण गराउँदै वर्तमान चुनौती समाधान गर्न पनि काङ्ग्रेसलाई जिताउन आवश्यक रहेको धारणा राखे। “देशलाई सही मार्ग, निकास र विकासको दायरामा लैजान काङ्ग्रेसलाई मत दिनु अनिवार्य छ,” उनले भने।
कार्यक्रममा बोल्दै पूर्व सांसद अमय कुमार यादव ले काङ्ग्रेस विचारको पार्टी भएको उल्लेख गर्दै समृद्धि र सुशासनका लागि काङ्ग्रेसको जित अपरिहार्य रहेको बताए। उनले काङ्ग्रेस विजयी भए देश आर्थिक तथा सामाजिक रूपान्तरणतर्फ अघि बढ्ने विश्वास व्यक्त गरे।
खोकसीमा सम्पन्न उक्त चुनावी सभाले सिरहा–२ मा काङ्ग्रेसको चुनावी अभियान थप सक्रिय र उत्साहजनक बनेको संकेत दिएको छ। निर्वाचन नजिकिँदै जाँदा विभिन्न दलबीच प्रतिस्पर्धा चर्किँदै गएको छ।
