महेश सिंह
लहान ३१ असोज। अस्पताल वा सार्वजनिक निकायका नयाँ संरचना उद्घाटन गर्दा मन्त्री, नेता वा प्रशासकहरूलाई रिबन काट्न लगाउने परम्परा सामान्यझैँ भइसकेको छ। तर, सिरहाको लहानस्थित रामकुमार शारडा उमा प्रसाद मुरारका प्रादेशिक अस्पतालले भने एउटा पृथक र उदाहरणीय अभ्यासको सुरुवात गरेको छ। अस्पतालले कुनै उच्चपदस्थ व्यक्तिलाई नबोलाई उपचारका लागि आएका एक बिरामीकै हातबाट सुधार गरिएको इमर्जेन्सी कक्षको रिबन काटेर उद्घाटन गराएको छ।
विगतमा पूर्वाधारको अभाव र फोहोरका कारण आलोचना झेल्दै आएको यो अस्पतालको इमर्जेन्सी (आकस्मिक) कक्षले अहिले नयाँ मुहार फेरेको छ। भौतिक पूर्वाधार व्यवस्थित बनाएसँगै सेवा प्रवाहमा व्यापक सुधार आएपछि बिरामी तथा स्वास्थ्यकर्मी दुवैले ठूलो राहत महसुस गरेका छन्।
कष्टकर विगतबाट व्यवस्थित वर्तमानतर्फ
यसअघि लहान अस्पतालको इमर्जेन्सी कक्ष बिरामीका लागि उपचार पाउने थलोभन्दा बढी सास्ती दिने ठाउँ बनेको थियो। साँघुरो ठाउँ, सिलिङ नहुँदा जस्तापाताबाट आउने अत्यधिक गर्मी, वर्षात्मा छानाबाट पानी चुहिने समस्या र कमजोर सरसफाइका कारण बिरामी र तिनका कुरुवा हैरान हुन्थे।
कल्याणपुर नगरपालिकाका बिरामी मनोजकुमार साह सम्झिन्छन्, “पहिले यहाँ उपचार गराउन आउँदा अत्यधिक गर्मी, साँघुरो ठाउँ र दुर्गन्धले साह्रै असहज हुन्थ्यो। तर अहिलेको व्यवस्थापन देख्दा अचम्मै लागेको छ, सेवा लिन धेरै सहज भएको छ।”
त्यस्तै, लहानका मङ्गैन यादवका अनुसार पहिले वर्षात्का बेला पानी चुहिने र सेवामा ढिलाइ हुने ठूलो समस्या थियो, जुन अहिले पूर्ण रूपमा हटेको छ।
सीमित साधन-स्रोतभित्रै ठूलो सुधार
इमर्जेन्सी कक्षका इन्चार्ज दीपेन्द्रप्रसाद सिंहका अनुसार जस्तापाताको छाना र सिलिङ नहुँदा गर्मी र वर्षात् दुवै मौसममा बिरामीको उपचार गर्न स्वास्थ्यकर्मीलाई समेत कठिन हुने गरेको थियो।
अस्पतालका मेडिकल सुपरिटेन्डेन्ट डा. वर्षा प्रकाशका अनुसार बिरामीको बढ्दो चापलाई दृष्टिगत गर्दै पुरानै संरचनालाई थप व्यवस्थित र प्रभावकारी बनाइएको हो। सुधारका क्रममा:
चट्याङ तथा विद्युतीय जोखिम न्यूनीकरणका लागि विद्युतीय व्यवस्थापन सुदृढ गरिएको,
पुराना जस्तापाता फेरेर पानी चुहिने समस्या समाधान गरिएको,
कक्षलाई रङ्गरोगन गरी आकर्षक बनाइएको,
बिरामीको गोपनियताका लागि स्क्रिनिङ र नयाँ फर्निचरको व्यवस्था गरिएको छ।
सेवा प्रवाहमा नयाँ आशा
विगतमा विविध विवाद र अस्तव्यस्तताका कारण चर्चामा आइरहने लहान प्रादेशिक अस्पतालमा पछिल्लो समय भौतिक पूर्वाधार र सेवा प्रणालीमा जोड दिन थालिएको छ।
इमर्जेन्सी कक्षको यो कायापलट र बिरामीकेन्द्रित सोचले लहान र आसपासका सर्वसाधारणलाई सहज, सफा र मर्यादित वातावरणमा आकस्मिक स्वास्थ्य सेवा पाउने विश्वास दिलाएको छ।
