काठमाडौं। निर्वाचन आयोगले आगामी प्रतिनिधिसभा र प्रदेशसभाको निर्वाचनको आन्तरिक तयारी शुरु गरिसकेको जनाएको छ । यसका लागि दुवै निर्वाचन एकै चरणमा सम्पन्न गर्ने गरी सरकारलाई सिफारिश गरिसकेको प्रमुख निर्वाचन आयुक्त दिनेशकुमार थपलियाले बताए। आयोगले आगामी मंसिर ४ गते निर्वाचनको मिति तोक्न सिफारिश गरेको उनले बताए। ‘हामी निर्वाचनको आन्तरिक तयारीमा लागि सकेका छौँ,’ उनले भने।
सरकारले उपकरण उपलब्ध गराउने भए आयोगले आगामी निर्वाचनमा विद्युतीय मतदान गराउने उनको भनाइ थियो । प्रमुख निर्वाचन आयुक्त थपलियाले स्थानीय तह निर्वाचनमा खर्च नबुझाउनेलाई कारबाही गर्ने बताए। उनले एक लाख ५६ हजार उम्मेदवार रहेकामध्ये एक लाख उम्मेदवारले खर्च विवरण नबुझाएकाले कारबाही गर्ने तयारी गरिएको बताए। आयोगले खर्च विवरण सङ्कलन गरिरहेको भन्दै नबुझाउने, तोकिएको समयमा नबुझाउने र समयमा बुझाए पनि खर्च सीमाभित्र नबुझाउनेलाई आयोगले पाँचवटा टोली गठन गरी छानबिन गरिरहेको उनको भनाइ छ ।
निर्वाचनको परिमाण भएको एक महिनाभित्र खर्च विवरण बुझाउनुपर्छ। उनले देशभरि नै अनलाइन मतदाता नामावली सङ्कलन गर्ने बताए। आगामी निर्वाचनमा स्थानीय तहमा प्रयोग गरिएका निर्वाचन सामग्री प्रयोग गरिने उनले जानकारी दिए। ‘२०७० को मतपेटिका अहिले पनि हामीले प्रयोग गरेका हौ। अहिले पनि ७७ जिल्ला निर्वाचन कार्यालयमा आगामी निर्वाचनमा प्रयोग गर्ने के कस्ता सामग्री छन् त्यसको विवरण पठाउन भनेका छौं,’ उनले भने, ‘आगामाी निर्वाचनमा पनि थुप्रै निर्वाचन सामग्री प्रयोग गर्न सकिनेछ। । आगामी निर्वाचनमा मतदान केन्द्रको पुनरावलोकन गरिने भएको छ।
सर्वोच्च अदालतको आदेशअनुसार अस्थायी मतदाता पनि आगामी निर्वाचनमा हुने उनले बताए। कारागारका कैदी, कर्मचारी, निर्वाचनका काममा खटिएका कर्मचारी पनि मतदानमा सहभागी गराइने भएको छ। अन्तिम नामावाली प्रकाशित गरेपछि मात्र अस्थायी मतदाताको नामा पनि प्रकाशित गरिने जनाइएको छ।
