बुटवल । रुपन्देहीको कल सेन्टर छापा प्रकरणमा थप एक जनालाई प्रहरीले पक्राउ गरेको छ ।
तिलोत्तमा नगरपालिका–२, जानकी नगरमा सञ्चालन भएको कल सेन्टरबाट ठगी भएको सूचनाका आधारमा केही दिनअघि प्रहरीले छापा मारेको थियो । प्रहरीले छापा मार्दा फरार रहेका व्यवस्थापक कमलजंग सेनलाई प्रहरीले पक्राउ गरी आज अदालतबाट म्याद थप गरेको छ । रोल्पा जिल्लाका ३४ वर्षीय सेनलाई बुटवलबाट पक्राउ गरिएको इलाका प्रहरी कार्यालय बुटवलका डीएसपी ठगबहादुर केसीले जानकारी दिए ।
पक्राउ परेका सेन उक्त कल सेन्टरको व्यवस्थापन हेर्ने व्यक्ति भएको प्रहरीको भनाइ छ । कल सेन्टरबाट हुने अवैध धन्दामा उनको संलग्नता रहेको आशंकामा प्रहरीले सुरुमै पक्राउ गर्न खोजे पनि उनी फरार थिए । छापा मार्दा भारतको बिहार राज्यका निरञ्जन कुमारसहित दाङ, घोराही उपमहानगरपालिका–१३ का हिमाल बाठा मगरलाई पक्राउ गरी प्रहरीले अनुसन्धान थालेको थियो ।
घटनाबारे आवश्यकता अनुसार कल सेन्टरका अन्य २४० जना कर्मचारीसँग सोधपुछ भइरहेको प्रहरीले जनाएको छ ।
कल सेन्टरबाट भएको ठगीबारे अनुसन्धान गर्न काठमाडौंबाट आएको सीआइबीको टोली ३ दिनपछि फिर्ता गएको छ । डीएसपीको कमान्डमा आएको दुई सदस्यीय टोलीले प्राविधिक पाटोको अनुसन्धान गरेर फर्किएको जनाइएको छ ।
टोलीले कल सेन्टरमा रहेका कम्प्युटर, मोबाइल आदिको अनुसन्धान गरेको छ । केही आवश्यक सामग्रीहरु सीआइबीको टोलीले थप अनुसन्धानका लागि काठमाडौं लगेको छ ।
कल सेन्टरमा प्रहरीले छापा मार्दा २५६ कम्प्युटर, ६ थान ल्यापटप लगायतका सामग्री बरामद गरेको थियो ।
