बञ्चरेडाँडामा फोहोर खन्याउन पुन: अबरोध, फोहोर बोकेका १४ टिपर स्थानीयद्वारा तोडफोड
काठमाडौं / जगत ठाडा मगर । बञ्चरेडाँडाका स्थानीयहरुले आफूहरूको मागलाई बेवास्ता गरेको भन्दै, सिसडोल-बञ्चरेडाँडामा काठमाडौंको फोहोर खन्याउन पुनः अवरोध गरेका छन् । आन्दोलनलाई हस्तक्षेप गरेको बताउँदै उनीहरूले महानगरको फोहोर बोकेको १४ वटा टिपर र सडक निर्माणमा प्रयोग गरिएका ३ वटा डोजरमा टोडफोड गरेका छन् ।
यसअघि मानवबस्तीलाई फोहोरमैलाबाट अलग गर्ने सहमति कार्यान्वयन नगरिएको भन्दै बञ्चरेडाँडा ल्यान्डफिल साइट प्रभावित क्षेत्र सरोकार समितिले भदौ १ गतेबाट फोहोर फ्याक्न नदिने चेतावनी दिएको थियो । रिपोर्टस क्लबमा समितिका संयोजक श्रीराम ढुंगानाले नेपाल सरकार र महानगरले फोहोरमैलाको बलिवेदीमा चढाएर लाखौं स्थानीय जनताको नरसंहार गर्ने काम गरिरहेको आरोप लगाएका थिए ।
सडक मर्मतलगायतका माग राख्दै धुनीबेँसी गाउँपालिका-१ का बासिन्दाले केही दिनयता फोहोर लैजान रोकेका थिए । स्थानीयको अवरोध हटाउन माग गर्दै महानगरले काठमाडौं प्रशासन र धादिङ प्रशासनलाई पत्राचारसमेत गरेको छ । यसअघि महानगरसँग १८ बुँदे सम्झौता भएपछि केही समय फोहोर खन्याउन दिएपनि पुन: स्थानीयले अवरोध गर्न थालेका छन् ।
