महेश सिंह सिरहा लहान – सिरहाको नवराजपुर गाउँपालिका–३ का किसान शियाराम महतोले एक दशकदेखि भाडाको जग्गामा व्यावसायिक तरकारी खेती गर्दै आए पनि राज्यबाट उपलब्ध हुने कृषि अनुदानबाट वञ्चित भएको गुनासो गर्नुभएको छ। वास्तविक किसानले अनुदान नपाउँदा खेतीप्रतिको उत्साह घट्दै गएको उहाँको भनाइ छ।
महतोले विगत १० वर्षदेखि भाडामा जग्गा लिएर मौसमी तथा विभिन्न प्रकारका तरकारी खेती गर्दै जीविकोपार्जन गर्दै आउनुभएको छ। तर, स्थानीय तह र कृषि ज्ञान केन्द्रबाट प्रदान गरिने अनुदान तथा प्रोत्साहन कार्यक्रमबाट आफू कहिल्यै लाभान्वित हुन नसकेको उहाँले बताउनुभयो।
उहाँका अनुसार उत्पादन बढाउन र खेतीलाई व्यावसायिक बनाउन राज्यको सहयोग आवश्यक भए पनि वास्तविक किसानभन्दा पहुँच भएका व्यक्तिले अनुदान पाउने प्रवृत्ति रहेको छ। “वास्तविक किसानले अनुदान पाउँदैनन्, झोले किसानले अनुदान पाउँछन्,” भन्दै महतोले अनुदान वितरण प्रक्रियामा निष्पक्षता र पारदर्शिता हुनुपर्ने माग गर्नुभयो।
लगातारको मेहनतपछि पनि अपेक्षित सरकारी सहयोग नपाउँदा खेतीपेशाप्रतिको मनोबल कमजोर बन्दै गएको उहाँको भनाइ छ। “यस्तै अवस्था रहने हो भने खेती छाडेर अर्को पेसा अपनाउनुपर्ने अवस्था आउँछ,” उहाँले दुखेसो पोख्नुभयो।
कृषि क्षेत्रलाई उत्पादनमुखी र आत्मनिर्भर बनाउने सरकारी नीति भए पनि वास्तविक किसानले अनुदान नपाएको गुनासो बढ्दै गएको छ। किसानहरूले अनुदान वितरणमा पारदर्शिता कायम गर्दै वास्तविक उत्पादनमा संलग्न किसानलाई प्राथमिकतामा राख्न सम्बन्धित निकायसँग माग गरेका छन्।
