परराष्ट्रमन्त्री आज चीन जाँदै
काठमाडौं: जगत ठाडा मगर । परराष्ट्रमन्त्री डा. नारायण खड्का आज चीनको भ्रमण जाँदैछन् । चिनियाँ विदेशमन्त्री वाङ यीको निमन्त्रणमा मन्त्री खड्का चीन जान लागेका हुन् ।
भ्रमणका क्रममा दुई देशका विदेशमन्त्री द्विपक्षीय बैठकमा उनी सहभागी हुनेछन् । त्यस्तै मन्त्री खड्काको सम्मानमा चिनियाँ विदेशमन्त्री वाङले रात्रीभोजको आयोजना गर्नेछन् । अमेरिकी तल्लो सदनकी सभामुख न्यान्सी पेलेसीको ताइवान भ्रमणले चीन-अमेरिका तनाव बढिरहेको बेला चीनले ताइवान मुद्दामा नेपालको समर्थन खोजेको छ । अघिल्लो सातामात्र नेपालका लागी चीनकी राजदूत होउ यान्छीले विज्ञप्तिमार्फत ताइवान मुद्दामा नेपालले चीनको साथ दिने छ भन्ने कुरामा आफू विश्वस्त रहेको बताएकी थिइन् ।
यस्तो अवस्थामा परराष्ट्रमन्त्री खड्काको चीन भ्रमणलाई कूटनीतिक हिसाबले महत्वका साथ हेरिएको छ । उनी २६ गतेसम्म त्यहाँ रहनेछन् ।
