काठमाडौँ । सहकारी ठगी प्रकरणमा पक्राउ परेका राष्ट्रिय स्वतन्त्र पार्टी (रास्वपा) का सभापति रवि लामिछानेको रिहाइको माग गर्दै रास्वपाले आज (मंगलबार) राजधानीमा आक्रोशपूर्ण प्रदर्शन गरेको छ। बालुवाटारमा केन्द्रित उक्त प्रदर्शनका क्रममा निषेधित क्षेत्र तोड्ने प्रयास गरेका कारण प्रहरीले ५१ जना नेता-कार्यकर्तालाई नियन्त्रणमा लिएको छ। पक्राउ पर्नेमा सांसद अशोक चौधरीसहितका शीर्ष नेताहरू रहेका छन्।
जिल्ला प्रहरी परिसर, काठमाडौँका एसपी नवराज अधिकारीका अनुसार पक्राउ परेकामध्ये एक जना महिला र बाँकी सबै पुरुष रहेका छन्। लामिछानेको पक्राउपछि रास्वपाले निरन्तर प्रदर्शन गर्दै आए पनि आजको प्रदर्शन थप आक्रामक बनेको थियो।
बालुवाटार क्षेत्रमा उत्रिएका रास्वपा समर्थकहरूले सरकार र प्रधानमन्त्री केपी शर्मा ओलीविरुद्ध चर्को नाराबाजी गर्दै निषेधित क्षेत्रलाई चुनौती दिने प्रयास गरेपछि प्रहरीले हस्तक्षेप गरेको हो। प्रदर्शनकारीलाई नियन्त्रणमा लिएर काठमाडौँका विभिन्न प्रहरी वृत्तमा राखिएको छ।
सभापति लामिछानेको गिरफ्तारीलाई राजनीतिक पूर्वाग्रहको उपज ठहर गर्दै रास्वपाले लामिछानेको तत्काल रिहाइको माग गरेको छ। रास्वपाका कार्यकर्ताहरूले सरकारलाई दबाब दिन निरन्तर आन्दोलन जारी राख्ने चेतावनीसमेत दिएका छन्।
