सिरहा । सिरहा कारागारभित्र कैदीहरूले मदिरा सेवन तथा अवैध लागुऔषधको कारोबार गर्दै आएको विषयमा अनुसन्धान गर्न पाँच सदस्यीय छानबिन समिति गठन गरिएको छ। प्रहरी नायब उपरीक्षक विष्णुप्रसाद सोतीको नेतृत्वमा गठित समितिमा जिल्ला प्रशासन र कारागार कार्यालयका प्रतिनिधिहरूको पनि सहभागिता छ। सिरहाका प्रमुख जिल्ला अधिकारी वासुदेव दाहालले जानकारी दिएअनुसार समितिले सोमबारदेखि औपचारिक रूपमा अनुसन्धान कार्य थाल्नेछ।
प्रजिअ दाहालले छानबिन समितिलाई १५ दिनभित्र प्रतिवेदन बुझाउन समयावधि तोकिएको जनाए। समितिले तयार पारेको प्रतिवेदनकै आधारमा कानुनी प्रक्रिया अगाडि बढाइने बताइएको छ। केही दिनअघि कैदीहरूले कारागारभित्रै मदिरा पिएको र मोबाइल चलाएको दृश्य सार्वजनिक भएपछि यो प्रकरण थप गम्भीर बनेको हो। साथै, कारागारभित्र लागूऔषधको आपूर्ति भइरहेको तथ्य पनि खुलासा भएको छ।
गत शनिबार सिरहाका प्रमुख जिल्ला अधिकारी दाहालको नेतृत्वमा नेपाल प्रहरी, सशस्त्र प्रहरी बल र नेपाली सेनालगायत सुरक्षा निकायले कारागारको आकस्मिक अनुगमन गरेका थिए। अनुगमनका क्रममा कारागारभित्र सुर्ती, चुरोट लगायतका अवैध सामग्री समेत फेला परेको बताइएको छ।
यस प्रकरणलाई थप गम्भीरताका साथ हेरिँदै कारागार व्यवस्थापन विभागले जिल्ला प्रशासन कार्यालय सिरहालाई घटनाको छानबिन गरी संलग्नलाई कारबाही गर्न निर्देशन दिइसकेको छ भने कारागार कार्यालयलाई समेत प्रतिवेदन पेश गर्न आदेश दिएको छ।
समाचार रासस रातोपाटी
