काठमाडौं।प्रेस काउन्सिल नेपालले सामाजिक सञ्जालमा समाचार सामग्रीको निगरानी सुरु गरेको छ। काउन्सिलले फेसबुक, युट्युब जस्ता प्लेटफर्ममा प्रकाशित सामग्रीलाई तथ्यपूर्ण र विश्वसनीय बनाउन अनुगमन कार्यविधि लागू गरेको छ।
काउन्सिलले सञ्चार माध्यमसँग सम्बन्धित वा असम्बन्धित पेज तथा च्यानलहरूमा आपत्तिजनक, अमर्यादित र अफवाहपूर्ण सामग्रीको प्रवृत्तिगत अध्ययनसहित सचेतना र सुधारका कामसमेत गरिरहेको जनाएको छ। यस अन्तर्गत, अश्लीलता, द्वन्द्व बढाउने, अन्धविश्वासलाई प्रश्रय दिने लगायतका सामग्रीप्रति अनुसन्धान गरी कारबाहीका लागि साइबर ब्युरोमा पत्राचार गरिएको पनि विज्ञप्तिमा उल्लेख छ।
विज्ञप्तिमा, सामाजिक सञ्जाल दुरुपयोग गरी सञ्चार माध्यमको विश्वसनीयता खल्बलाउन खोजिएको प्रयासप्रति काउन्सिलको गम्भीर ध्यानाकर्षण भएको जनाइएको छ। काउन्सिलका अध्यक्ष बालकृष्ण बस्नेतले सामाजिक सञ्जालमा कुनै सामग्री प्रकाशन गर्नुअघि विश्वसनीयताको परीक्षण आवश्यक रहेकोमा जोड दिँदै मिडियाको सुदृढिकरणका लागि सबैलाई जिम्मेवार बनिनुपर्ने धारणा राखेका छन्।
