काठमाडौं।मलेसियाको क्वालालम्पुरस्थित बायुमान ओभलमा नेपाल यू-१९ महिला टोलीले आज एसिया कप सुपर फोर अन्तर्गत बंगलादेशविरुद्ध खेल्दैछ। खेल बिहान ११:४५ बजे सुरु हुनेछ।
नेपाल पहिलो पटक महिला एसिया कप खेलिरहेको हो। समूह चरणमा उत्कृष्ट प्रदर्शन गर्दै समूह उपविजेता बनेर सुपर फोरमा स्थान बनाएको नेपालले सुपर फोरको पहिलो खेलमा श्रीलंकासँग प्रतिस्पर्धा गर्न सकेन, किनभने खेल वर्षाका कारण रद्द भएको थियो।
बंगलादेशसँग आजको खेल नेपालका लागि निकै महत्वपूर्ण छ। नेपालले बंगलादेशलाई पराजित गर्न सके फाइनलमा स्थान बनाउने सुनौलो अवसर हुनेछ। बंगलादेश भने बिहीबारको खेल जित्दै फाइनलमा प्रवेश गरिसकेको छ।
हाल नेपालले समूह चरणका ३ अंक र सुपर फोरको १ अंक गरी कुल ४ अंक जोडेको छ। बंगलादेशले पनि ४ अंक नै जोडे पनि रनरेटमा अगाडि रहेकाले नेपाल तेस्रो स्थानमा छ।
तर, वर्षाले आजको खेल प्रभावित गरेमा बंगलादेश रनरेटको आधारमा फाइनल पुग्नेछ। नेपालले फाइनलमा स्थान बनाउन आजको खेल जित्नै पर्ने दबाब छ।
नेपालका युवा खेलाडीहरू आफ्नो उत्कृष्ट प्रदर्शन गर्दै ऐतिहासिक फाइनलमा प्रवेश गर्न तयार देखिन्छन्।
