काठमाडौं, १ जेठ — नेपाली महिला क्रिकेट टोली आईसीसी महिला टी–२० विश्वकप एसिया छनोटको सुपर थ्री चरणमा प्रवेश गरेको छ।
शुक्रबार हङकङ र बहराइनबीचको खेल वर्षाले रद्द भएपछि नेपाल र हङकङको समान ५–५ अंक भए पनि नेपालले बढी जित निकालेको आधारमा अगाडि बढेको हो।
आईसीसीको प्लेइङ कन्डिसनअनुसार डबल राउण्ड रोबिन लिगपश्चात् दुई वा बढी टोलीबीच अंक बराबर भए सर्वाधिक जितका आधारमा टोली अगाडि रहने प्रावधान छ।
नेपालले ४ खेलमा २ जित, १ हार र १ नतिजाविहीन खेलबाट ५ अंक जोडेको थियो। हङकङले भने ४ खेलमा १ जित र ३ नतिजाविहीन खेलबाट ५ अंक जोडेको थियो।
हङकङ विजयी भएको अवस्थामा ६ अंकसहित समूह विजेता बन्दै अघि बढ्ने थियो। तर, हङकङ १ जितमै सीमित रह्यो।
९ टोली सहभागी प्रतियोगितामा तीन समूहबाट ३–३ टोली रहन आएका थिए। तीमध्ये शीर्ष टोलीहरू सुपर थ्रीमा प्रवेश गरेका छन्। त्यहाँबाट एकअर्कासँग खेलेपछि शीर्ष २ टोली विश्वकप ग्लोबल छनोटमा पुग्ने छन्।
नेपालले अब सुपर ३ मा यूएई र थाइल्याण्डसँग प्रतिस्पर्धा गर्नेछ।
