महेश सिंह लहान सिरहा –रामनगर–मिर्चैया उद्योग वाणिज्य संघको आगामी मंसिर २६ गते हुने निर्वाचन नजिकिँदै गर्दा अध्यक्षका उम्मेदवार राज कुमार साहले व्यवसायीहरूसँग मत, साथ र सद्भावको अपिल गरेका छन्। सामाजिक तथा व्यवसायिक क्षेत्र दुवैमा सक्रिय साह संघलाई आधुनिक र सदस्य–मैत्री संस्थामा रूपान्तरण गर्ने लक्ष्यका साथ मैदानमा उत्रिएका हुन्।
साह हाल नेपाल पेट्रोलियम डिलर एसोसिएसनका केन्द्रीय सदस्य, लायन्स क्लब अफ मिर्चैयाका चार्टर प्रेसिडेन्ट, साथै भोला बाबा फ्युल सेन्टर (मिर्चैया–७) र जय दीपक ट्रेड सेन्टर (मिर्चैया–६) का व्यवसायिक प्रतिनिधि हुन्।
उनले प्रस्तुत गरेको योजनामा कोसेली घर तथा प्रदर्शनी केन्द्र स्थापना, औद्योगिक ग्राम निर्माण, संघका सदस्यलाई डिजिटल–मैत्री बनाउने, बजारमा देखिएको मन्दी हटाउन समन्वित बजार सञ्चालन अभियान, सदस्यका लागि बीमा सुविधा, राहत कोष स्थापना, तथा व्यवस्थित पार्किङ लगायत महत्वपूर्ण विषय समावेश छन्।
त्यसैगरी, संघमा सूचना केन्द्र स्थापना, समयअनुसार विधान संशोधन, आन्तरिक राजस्व कार्यालयसँग समन्वय र सहजीकरण, तथा बन्द व्यवसायलाई स्थानीय तहमा छुट गरी फर्म बन्द गराउने पहल समेत उनको एजेण्डामा छ।
साहले व्यवसायीहरूको समस्यामा साथ दिने, संघलाई सक्रिय, पारदर्शी र परिणाममुखी बनाउने दृढता व्यक्त गर्दै सबै सदस्यहरूसँग अमूल्य मतको अनुरोध गरेका छन्।
