सुरेश यादव,नवलपरासी २९ जेष्ठ ।बाढीका कारण हुने क्षति न्युनिकरणका लागी आज पश्चिम नवलपरासीको पाल्हीनन्दनमा त्यस्ता बाढिबाट कसरी बाच्ने र बचाउने जस्ता जोखिमको पूर्व तयारी स्वरुप प्रयोगात्मक अभ्यास गरिएको छ ।
नवलपरासीको सेनाको आयोजनामा र जिल्ला विपद् व्यवस्थापन समितिको समन्वयमा भएको अभ्यासमा तिनै तहका सुरक्षा निकायले डुबानमा परेकाहरुको कसरी तत्कालै उद्दार गरी जनधनको क्षति बाट बचाउने भन्ने बारे पूर्व तयारी अभ्यास प्रस्तुत गरेका थिए । घरायसी प्रयोगका सामाग्रि मार्फत पनि बाढीमा डुब्न बाट कसरी बच्न सकिन्छ भन्ने बारे सेनाको अभ्यास टोलीले स्थानियहरुलाई जानकारी दियो ।
बाढी र डुबानको जोखिमले ७७ जिल्ला मध्ये १७ औँ स्थानमा रहेको पश्चिम नवलपरासीमा हरेक वर्ष वर्षायाममा ठुलो जनधनको क्षति हुदै आएकाले स्थानियलाई समेत सचेत गराउन विपद् प्रतिकार्य अभ्यास गरिएको प्रमुख सेनानी ज्ञानकाजी श्रेष्ठले जानकारी दिनुभयो ।
गरिएको प्रयोगात्मक अभ्यास बाट सुरक्षा निकायलाई राहत र उद्दारका लागि सिकाइ हुने र आगामी दिनमा कसरी काम गर्न सकिन्छ भन्ने विषयमा थप निखार आउने प्रमुख जिल्ला अधिकारी श्रवण कुमार पोखरेलले बताउनुभयो ।
उक्त कार्यक्रममा नेपाली सेनाको २२ नम्बर बाहिनी अड्डाका सहायक रथी नवराज गुरुङ्ग सहित सुरक्षाका निकायका प्रमुख, स्थानीय तहका प्रमुख लगायतको सहभागिता रहेको थियो ।
