प्रदिप सिंह
लहान ७ भदौ । सिरहाको नवराजपुर गाउँपालिकाका पाँचवटै वडामा समाजसेवी तथा नेपाली कांग्रेसका नेता जयकिशोर यादव गरिब, दलित तथा अतिविपन्न परिवारका सहारा बन्दै गएका छन्।
राजनीतिक नेतृत्वसँगै सामाजिक सेवामा समेत सक्रिय यादव पछिल्लो समय स्थानीयका लागि सहयोगी व्यक्तिका रूपमा स्थापित हुँदै गएका छन्।
यादवले नवराजपुर गाउँपालिका–१ देखि वडा नम्बर ५ सम्म विभिन्न बस्तीमा पुगेर विपन्न परिवारलाई सहयोग गर्दै आएका छन्। हालसम्म पाँचवटै वडामा करिब १४ सय झुल वितरण गरिसकेको उनले बताए।
लामखुट्टेको टोकाइबाट विभिन्न रोगको जोखिम बढ्ने भएकाले विपन्न परिवारलाई राहत पुगोस् भन्ने उद्देश्यले झुल वितरण अभियान सञ्चालन गरिएको यादवको भनाइ छ।
यसैक्रममा आइतबार नवराजपुर गाउँपालिका–५ कुसन्डीमा दलित तथा गरिब परिवारलाई झुल वितरण गरिएको छ। मरिक, साफी र पासमान समुदायका तीनवटा बस्तीमा गरी करिब ९६ वटा झुल वितरण गरिएको यादवले जानकारी दिए।
जनताको बीचमै पुगेर सेवा र सहयोगमा सक्रिय रहेका यादव पछिल्लो समय गाउँदेखि चिया पसलसम्म चर्चामा छन्। गरिब, दलित तथा विपन्न परिवारको सुख–दुःखमा साथ दिँदै आएका यादवको सामाजिक सक्रियताको स्थानीयस्तरमा प्रशंसा हुन थालेको छ।
