लहान १४ भदौ । धनगढीमाई नगरपालिका–१३ का वडा कार्यालय निर्माणका लागि जग्गा उपलब्ध गराउने समाजसेवी विष्णु न्यौपानेको सामाजिक योगदानको स्थानीयस्तरमा चर्चा बढेको छ। सार्वजनिक हितका लागि व्यक्तिगत सम्पत्ति निस्वार्थ रूपमा उपलब्ध गराउँदै आएका न्यौपानेजस्तो स्वच्छ छवि र सामाजिक सोच भएका व्यक्तिलाई राजनीतिमा सक्रिय बनाउनुपर्ने आवाजसमेत स्थानीयस्तरमा उठ्न थालेको छ।
न्यौपानेले वडा कार्यालय निर्माणका लागि जग्गा उपलब्ध गराउनुका साथै कोरोना चोक विस्तारका लागि समेत करोडौं रुपैयाँ मूल्य बराबरको जग्गा निस्वार्थ रूपमा दान गरेको स्थानीय बताउँछन्। सार्वजनिक प्रयोजनका लागि आफ्नो सम्पत्ति उपलब्ध गराउने उनको निर्णयलाई स्थानीयले समाजसेवाको उदाहरणका रूपमा लिएका छन्।
स्थानीयका अनुसार न्यौपाने सामाजिक गतिविधिमा सक्रिय रहँदै आएका बौद्धिक तथा विचारशील व्यक्तित्व हुन्। पालिकाका विभिन्न सार्वजनिक सरोकारका विषयमा चासो राख्दै आएका उनले विकास निर्माणमा स्थानीय सहभागिता र सार्वजनिक हितलाई प्राथमिकता दिँदै आएका छन्।
वडा कार्यालय निर्माणका लागि जग्गा उपलब्ध गराउनु उनको सामाजिक योगदानको महत्वपूर्ण उदाहरण भएको स्थानीयको भनाइ छ। सार्वजनिक प्रयोजनका लागि जग्गा दान गर्ने उनको निर्णयले स्थानीय तहमा सामाजिक उत्तरदायित्व र सेवाभावको चर्चा पनि बढाएको छ।
स्थानीयको एक समूहले भने अब न्यौपानेलाई सामाजिक क्षेत्रमा मात्र सीमित नराखी राजनीतिमा समेत सक्रिय भूमिका निर्वाह गर्न आग्रह गरेको छ। स्वच्छ छवि, बौद्धिक क्षमता र सामाजिक सेवामा गरेको योगदानका आधारमा उनी राजनीतिमा आए स्थानीय तहको नेतृत्वमा सकारात्मक प्रभाव पार्न सक्ने स्थानीयको विश्वास छ।
