रौतहट । दाइजो कम दिएको भन्दै विवाह भएको २७ दिनमै परिवारद्वारा युवतीको घाँटी थिचेर हत्या गरेको छ ।
रौतहट कटहरिया नगरपालिका- ५ बलिरामपुरकी रामचन्द्र दास तत्माको छोरी वर्ष २० की सन्जु कुमारी दासको हत्या भएको हो । असार ६ गते समाजिक परम्परा अनुसार रौतहटकै बृदावन नगरपालिका -६ का चन्देश्वर दास तत्माको छोरा वर्ष २२ को रामाकन्त दाससँग विवाह भएको थियो ।
तिम्रो आमाबुबाले दाईजो कम दियो भनेर पटकपटक छोरीसँग परिवारले झगडा गर्ने, कुटपिट गर्ने गरेको खबर माइतीलाई गर्थिन सन्जुले । बुबा रामचन्द्र दासले भन्छन्, भर्खर विवाह भएको थियो । घरमा खर्चबर्च सकेको थियो । आर्थिक मन्दीमा छोरी ज्वाईंलाई थप सहयोग गर्ने स्थिति भएन । छोरीलाई मिलेर सहेर बस्नु भनेको थिएँ । नभन्दै २७ दिनपछि साउन ४ गते मृत्यु भएको खबर आयो । त्यसपछि संसार अध्यारो भए जस्तो भयो । विक्षिप्त भएँ । अहिले प्रहरीलाई जाहेरी दिँदा प्रहरीले जाहेरी लिन मानिरहेको छैन्, उनले भने ।
मृतक सन्जुको दाई रामप्रवेश दासले भन्छन्, जे – जे भएपनि बहिनीलाई घाँटी थिचेर हत्या भएको त्यसै देखिन्छ । तर प्रहरीलाई उजुरी दिन जाँदा उजुरी लिन मानेको छैन् । हाम्रो नजरमा हत्या आशंकामा संलग्नहरुका विरुद्ध न्याय र छानवीनको लागि जाहेरी दिनु हो । प्रहरीले पक्राउ गरी यसको अनुसन्धान गर्ने हो । तर प्रहरीले नै जाहेरी नलिएपछि अनुसन्धान कसलाई गर्ने हो ? हामीले न्याय कसरी पाउने हो ? देशमा त हत्या गर्ने, हत्यामा प्रोत्साहन गर्नेलाई समेत कानुनको व्यवस्था छ । तर खोई सुनुवाइ ?
स्थानीय ईप्रका प्रमुख वीरेन्द्र पासवानका अनुसार, युवतीको हत्या भन्दा आत्महत्याको शंका रहेकोले अनुसन्धान भईरहेको बताए । उनले भने, परिवारले अनावश्यक मानिसहरुको नाममा दिएको जाहेरी कसरी लिनु ?
