काठमाडौं । लेखक तथा राजनीतिक विश्लेषक राजेश विद्रोही सप्तरी निर्वाचन क्षेत्र नम्बर ४ बाट संसदीय निर्वाचन लड्ने सार्वजनिक गरेका छन् ।
आफ्नो फेस्बुक ट्विटर लगायतका समाजिक संजालमा आफूले संसदीय चुनाव लड्ने मनसाय बनाएको कुरा सार्वजनिक गर्नुभएको छ । उहाँ लेख्नुहुन्छ- ´सप्तरी क्षेत्र ४ बाट म पनि यसपटकको संसदीय चुनाव लड्ने मनसायमा छु है मित्रहरु, जनसमुदायहरु । अबको युग फेर्ने हो कि पुरानैको निरन्तरता दिने हो, फैसला तपाईहरुको हातमा छ । असन्तुष्टिको पोको बोकेर मात्र हिड्ने हो कि हामीले सन्तुष्टिको पोको पनि निर्माण गर्ने हो ? यसर्थ समयअनुसार आफ्नो युग र दायित्व फेरौं । हार जीत गराउने भोट तपाई हामीसँग छ भने कुरा बुझ्नुस्, जित तपाई हाम्रो निश्चित छ । अनि किन डगमगाउनु… ? धन्यवाद !!`
यसरी उहाँले आफ्नो मनसाय अभिव्यक्त गरेका छन् । तर उहाँले संघीय सांसदमा चुनाव लड्ने कि प्रदेशसभा सांसदमा भने कुरा उल्लेख गर्नुभएको छैन् । न त लड्ने राजनीतिक दलको नाम नै उल्लेख गर्नुभएको छ ।
विद्रोही डा. बाबुराम भट्टराई निकटका नेता हुन् । जनता समाजवादी पार्टी (जसपा ) मा उनी केन्द्रीय सदस्यका रुपमा थिए । बाबुराम अलग भएपछि उनी उतै लागिएको भनिएता पनि बाबुरामको केही मुद्दा र योजनामा उहाँले विगतदेखि फरक विचार राख्दै आएको एकजना केन्द्रीय सदस्यले जानकारी दिनुभएको छ । ति केन्द्रीय सदस्यका अनुसार विद्रोही बाबुराम निकट मानिए पनि बाबुरामको तीन कलस्टको अवधारणा र १०+ १ गैर भौगोलिक संघीयता लगायतका केही मुद्दा र विषयमा विद्रोहीको फरक धारणा रहेको बताए । अहिले बाबुराम पक्षले नेपाल समाजवादी पार्टी ( नेसपा ) चुनावचिन्ह आँखा राखेर दल दर्ता गर्ने तयारीमा रहेको उनले थपे ।
सप्तरी खडक नगरपालिका -३ गरुराहा घर भएका विद्रोहीको वास्तविक नाम राजदेव राम हो । विधार्थी जीवनमा उनीमाथि चरम समाजिक अन्याय भएपछि सानै उमेरमा घरबाट भागेर माओवादी जनयुद्धमा होमिएका थिए । जनयुद्धमा लागेपछि वास्तविक नामभन्दा सुरक्षाका लागि अवास्तविक नाम राख्ने चलन रहेकोले उसको पहिलो नाम विद्रोही थियो । जनमुक्ति सेनाको कम्पनी कमान्डर भएपछि उसको विद्रोही टेक नाम राज्यपक्षलाई थाहा भएपछि विद्रोही नाम फेरेर राजेश राखेका थिए । शान्ति प्रक्रियामा आइसकेपछि उसले पहिलो पुस्तक ´रक्तमुच्छेल अंकुरण` प्रकाशित गर्नेबेला वास्तविक नामभन्दा जनयुद्धकै नाम स्थापित भइसकेको कारण सबैको सल्लाह मुताविक दुबै नामलाई जोडेर राजेश विद्रोही नामले स्थापित हुन पुगेको हो । अहिले नेपालको समाजिक राजनीतिक क्षेत्रमा साथै लेखन विश्लेषणको क्षेत्रमा राजेश विद्रोही ख्यातिप्राप्त नाम हो ।
उहाँ जनयुद्धमा सामान्य घाइते देखि प्रहरी हिरासतको जीवन पनि भोग्नुभएको हो । बाबुरामले नेकपा माओवादी छोडेपछि विद्रोहीले पनि बाबुरामकै पछि लागे । मुलुकको समसमायिक राजनीतिक विषय देखि दलित मुद्दामा लामो समयदेखि लेख अनुसन्धान गर्नुको साथै अभियान चलाउँदै आएका छन् भने उनको केही किताबहरु पनि प्रकाशित छन् । राष्ट्रिय दलित मुक्ति जागरण अभियानका केन्द्रीय संयोजकका रुपमा दलित समुदायमाथिको समस्या समाधानका निम्ति काम समेत गर्दै पनि आएका छन् ।
