रुपन्देही । हिरासतमा रहेकी महिलामाथि यौन दुर्व्यवहार गरेको आरोपमा इलाका प्रहरी कार्यालय कोहलपुरको मुद्दा शाखामा कार्यरत असई प्रविण चौलागाई पक्राउ परेका छन् ।
साउन ११ गते बहुविवाह मुद्दामा पक्राउ परेकी ती महिलालाई असई चौलागाईले मध्यराति आफू सुत्ने कोठामा लिएर गएको पुष्टि भएपछि उनलाई पक्राउ गरी आवश्यक अनुसन्धान अगाडि बढाइएको जिल्ला प्रहरी कार्यालय बाँकेका एसपी श्यामकृष्ण अधिकारीले जानकारी दिए ।
अधिकारीका अनुसार चौलागाईले हिरासतमा रहेकी ती महिलालाई आवश्यक शोधपुछका लागि भन्दै शुक्रबार मध्यराति दुई बजे हिरासतको माथिल्लो तलाको आफू सुत्ने कोठामा लगेर सामान्य सोधपुछ गर्नुका साथै हातपात पनि गरेको आरोप छ ।
महिलामाथि यौन दुर्व्यवहार तथा बलात्कार गरेको आशंकामा चौलागाईंलाई पक्राउ गरी जिल्ला प्रहरी कार्यालयमा ल्याएर आवश्यक अनुसन्धान गरिहेको एसपी अधिकारीले बताए । असई चौलागाईंले ती महिलालाई मध्यरातमा निकाल्न आदेशपछि हिरासतमा बसेका अरूले हो–हल्लासमेत गरेका थिए ।
उनले उक्त महिलालाई १० मिनेटसम्म कोठामा राखेको बताइएको छ । बर्दिया घर भएका चौलागाईं विगत ८ महिनादेखि इलाका प्रहरी कार्यालय कोहलपुरको मुद्दा शाखामा कार्यरत छन् ।
