रुपन्देही । रुपन्देहीको तिलोत्तमा-१७ की ३० वर्षीया वर्षाकुमारी चौधरीले आफ्नै श्रीमानविरुद्ध जबरजस्ती करणी गरेको भन्दै प्रहरीमा उजुरी दिएकी छन्। चौधरीले मंगलबार इलाका प्रहरी कार्यालय बुटवलमा श्रीमान् मोहन चौधरीविरूद्ध जबरजस्ती करणी गरेको उजुरी दिएकी हुन्।
मोहन तिलोत्तमा नगरपालिकाका उपप्रमुख जागेश्वरीदेवि चौधरीका छोरा हुन्। न्यायिक समितिका संयोजकसमेत रहेका उपप्रमुख जागेश्वरीकै बुहारी न्याय खोज्दै प्रहरीमा पुगेकी हुन्। इलाका प्रहरी कार्यालय बुटवलका प्रमुख प्रहरी नायव उपरीक्षक ठग बहादुर केसीले जाहेरी दर्ता भएको बताउँदै अनुसन्धान गर्ने बताए। जाहेरीमा उपप्रमुख चौधरीका छोरा मोहनले साउन १५ गतेदेखि पटक पटक आफूमाथि जबरजस्ती करणी र कुटपिट गरेको भन्दै बुहारी वर्षाकुमारीले दर्ता गरेको जाहेरीमा उल्लेख छ।
गत साउन १४ गते राति मदिरा पिएर आएका उनका पति मोहनले कुटपिट गरेको उनले दाबी गरेकी छन्। वर्षाले केहिदिन अघि श्रीमान् मोहनले दैनिक रूपमा लागूपदार्थ सेवन गरी कुटपिट गर्ने, गाली बेइज्जती गर्ने र मानसिक यातना दिने गरेको भन्दै इलाका प्रहरी कार्यालय मंगलापुरमा उजुरी दिएकी थिइन्।
श्रीमानले कुटपिट गरेर वर्षाको शरीरमा घाउ चोटसमेत लागेको छ। मोहनले दैनिक लागूपदार्थ सेवन गर्ने, गाँजा भर्नलगाउने, शारीरिक तथा मानसिक तनाव दिँदा घरका सासू ससुराले समेतले बेवास्ता गरेको वर्षाले प्रहरीसमक्ष बताएकी छन् । गाडी चलाउने काम गर्ने श्रीमान् मोहनले घरखर्च नदिने, यातना दिने र सासू जागेश्वरी एवं ससुराले समेत बेवास्ता गर्दा आफूले बच्चाको लालनपालनमा समस्या भोगेको प्रहरी समक्ष बताएकी छन्।
