सलिना मगर सर्लाही : सर्लाहीको बरहथवाबाट बहुमुल्य गरगहना,र रकमसहित दुईजना पक्राउ परेका छन् । बरहथवा नगरपालिका ११ हिरापुर ब्यारेज स्थित नयारोड बाट हिरापुर तर्फ जाँदै गरेको समयमा प्रहरीले पक्राउ गरेका हुन।
इलाका प्रहरी कार्यालय बरहथवाबाट खटिएको प्रहरी टोलीले ३६ लाख नगद र १९,५८००० हजार बराबरको सुनको गहना, सिक्री,ब्रास्लेट एक थान, मोटरसाइकल सहित दुईजनालाई पक्राउ गरेको जिल्ला प्रहरी कार्यालय सर्लाहीले जनाएको छ ।
पक्राउ पर्नेमा डोटीको शिखर नगरपालिका–७ स्थायी घर भई काठमाडौंको कपन बस्दै आएका ३० वर्षीय हर्कबहादुर कठायत र भक्तपुरको चाँगुनारायण–२ दुवाकोटका ३१ वर्षीय विशाल खत्री रहेका जिल्ला प्रहरी कार्यालय सर्लाहीका प्रहरी नायब उपरीक्षक विजय यादवले जानकारी दिए । मोटरसाइकलसहित उनीहरुलाई रोकेर प्रहरीले खानतलासी गरेको थियो । घटनाबारे थप अनुसन्धान भइरहेको सर्लाही प्रहरीले जनाएको छ ।
