महेश सिंह सिरहा लहान- सिरहाको सखुवानान्कारकट्टी गाउँपालिका–४ मा रहेको ग्राम ज्योति कृषि सहकारी संस्थालाई केन्द्रमा राखेर वडा अध्यक्ष रमेश गोइत र सहकारीका सञ्चालक विजय झाबीच आरोप–प्रत्यारोप सार्वजनिक भएको छ।
सहकारी सञ्चालक झाले वडा अध्यक्ष गोइतले आफूलाई खादमलको कालोबजारी गरेको आरोप लगाउँदै पटक–पटक मानसिक तनाव दिएको दाबी गरेका छन्। उनले रातिको समयमा प्रहरी परिचालन गरी समात्न खोजिएको समेत आरोप लगाएका छन्। झाका अनुसार सहकारीमार्फत वास्तविक किसानलाई नियमित रूपमा र आवश्यक प्रक्रिया पूरा गरी मलखाद वितरण गर्दै आइएको छ।
झाले वडा कार्यालयबाट कमिशन नदिएको कारण आफूविरुद्ध विभिन्न षड्यन्त्र रचिएको तथा प्रतिशोध साँधिएको आरोप पनि लगाएका छन्। उनका अनुसार आफूले कुनै प्रकारको कालोबजारी नगरेको र किसानलाई पारदर्शी रूपमा मल वितरण गरेको दाबी गरेका छन्।
यस्तै, स्थानीय किसानहरूको एक समूहले वडा अध्यक्षका आफन्तले ४५ बोरा मलमध्ये ३० बोरा आफ्ना नजिकका व्यक्तिलाई वितरण गरेको आरोप लगाएका छन्। उक्त विषयमा स्थानीय दवारीका प्रसाद यादवको अध्यक्षतामा बसेको बैठकमा सहभागी सयौँ किसानले समेत निष्पक्ष छानबिनको माग गरेको दाबी गरिएको छ।
यता वडा अध्यक्ष रमेश गोइतले भने आफूमाथि लगाइएका सबै आरोप अस्वीकार गरेका छन्। उनले आफूले कसैसँग कमिशन नमागेको र सहकारी सञ्चालकले लगाएका आरोप निराधार तथा बहानाबाजी मात्र भएको प्रतिक्रिया दिएका छन्।
विवादका विषयमा हालसम्म सम्बन्धित निकायबाट कुनै आधिकारिक छानबिन प्रतिवेदन सार्वजनिक भएको छैन। स्थानीयहरूले घटनाको निष्पक्ष अनुसन्धान गरी वास्तविकता सार्वजनिक गर्न सम्बन्धित निकायसँग माग गरेका छन्।
