सिरहा, ।राष्ट्रिय भुमी आयोग सिरहाले जिल्लाको चार वटा स्थानीय तहमा लक्षित गरेर जग्गाधनी दर्ता प्रमाणपुर्जा वितरण गर्ने कार्य अन्तिम चरणमा पुर्याएको छ ।
आयोगका सिरहा अध्यक्ष रामअधिन यादवले आफ्नै कार्यकक्षमा एक पत्रकार सम्मेलन गर्दै गोलबजार नगरपालिका, कर्जन्हा न.पा., मिर्चैया न.पा. र धनगढीमाई नगरपालिका गरी चार वटा स्थानीय तहमा आउने केही महिनाभित्र जग्गाधनी दर्ता प्रमाणपूर्जा वितरण गर्ने कार्य अन्तिम चरणमा पुगेको बताए ।
आयोगसँग भएको सम्झौता अनुरुप विभिन्न पालिकाहरु मध्ये चारवटा पालिकाले दु्रतगतिमा लागत संकलन गर्ने गरेर समयमै तथ्यांक उपलब्ध गराएको हुँदा जग्गाधनी दर्ता प्रमाणपूर्जा वितरण गर्ने कार्यमा सहयोग पुगेको उनले प्रष्ट पारे ।
यसरी नै लागत संकलन गरेर तथ्यांक उपलब्ध गराइदिन अन्य स्थानीय तहहरुलाई उनले आग्रह गरे ।
गोलबजार न.पा. २ हजार ८ सय ४६, कर्जन्हा न.पा. ६ सय ४६, मिर्चैया न.पा. १ हजार २ सय ९६ र धनगढिमाई न.पा. २ हजार ८ सय ५ गरी चार स्थानीय तहबाट कुल ७ हजार ५ सय ९३ घरधुरीको तथ्यांक आएको उनले थपे ।
उनका अनुसार आयोगले पनि विषेश छानविन गरेर तथ्यांकको अन्तिम सूची प्रकाशन गरेर जग्गाधनी दर्ता प्रमाणपुर्जा वितरण गर्ने छन् ।
राष्ट्रिय भुमी आयोगको अभियानलाई सफल बनाउन सहयोग गर्ने निकायहरुको कार्यलाई उनले प्रशंसा गरे ।
केही महिना अघि भएको स्थानीय तहको निर्वाचनले आयोगको कार्यमा असर पारेको भएपनि कर्मचारीहरुको परिश्रमले उपलब्धी मुलक कार्य भएको नापी कार्यालय सिरहाका प्रमुख रविन कुमार सिहले बताए ।
निर्वाचन पछि स्थानीय तहमा कार्यरत करारका कर्मचारीबारे आएको विवादले आयोगको कार्यमा समेत असर पारेको उनले प्रष्ट पारे ।
‘निर्वाचन र त्यसपछि करारका कर्मचारीबारे भएको विवादले आयोगको कार्यमा असर पार्यो,’उनले भने,‘तर नापी र आयोगका कर्मचारी तथा प्रमुखको समन्वयमा स्थानीय तहका केही व्यक्तिले सघाए पछि काममा केही सजता भयो ।’ चार स्थानीय तहसँगै अन्य स्थानीय तहसँग यसरी नै उपलब्ध हासिल गर्नका लागि समन्वय भइरहेको र आउने केही महिनामै लक्ष्यमा पुग्ने उनले विश्वास दिलाए ।
जग्गाधनी दर्ता प्रमाणपूर्जा मात्र वितरण गर्दैनौं सम्बन्धित व्यक्तिलाई जग्गा उपभोग गर्ने वातावरण समेत बनाउने पत्रकारको प्रश्नमा आयोगका सिरहा अध्यक्ष रामअधिन यादवले प्रष्ट पारे । जिल्लामा नियमले वितरण गर्न मिल्ने जग्गाको तथ्यांक समेत संकलन भइरहेको उनले थपे ।
