नवलपरासी । पश्चिम नवलपरासीका अधिकांश सामुदायिक विद्यालयमा दिवा खाजा गुणस्तरीय नभएको भेटिएको छ । नेपाल सरकारले विद्यालय सञ्चालन हुने दिनका लागि प्रतिविद्यार्थी दैनिक १५ रुपैयाँका दरले खाजाबापत विद्यालयलाई रकम दिदै आएको छ । तर, विद्यालयले भने विद्यार्थीलाई जंकफुड खुवाउने र बालबालिकाका लागि हानि गर्ने पिरो, चिल्लो, अमिलो र अस्वस्थकर खाजा खुवाइरहेको पाइएको हो । जवकी सरकारले विद्यार्थीहरुलाई जंकफुड दिने बिद्यालयमा निषेध गरिएको छ ।
परासीका बिद्यालयहरुमा दिवा खाजाका बारेमा चौतर्फी गुनासो आएपछि रामग्राम नगरपालिकाका नगर प्रमुख धनपत यादव रामग्राम नगरपालिका–९ मा रहेको जनता माविमा खाजा खाने समय अनुगमनमा पुगे । नगर प्रमुख पुग्दा विद्यार्थीहरू लहरै बसेर खाजा खाँदै थिए । बिद्यालायले सो समयमा भुजा र पास्ता खुवाइँदै थियो । जंकफुड नखुवाउन यादवले विद्यालय प्रशासनलाई निर्देशन दिए । ‘विद्यार्थीलाई जंकफुडको लत छुटाउन र स्वस्थकर पौष्टिक आहारका लागि दिवा खाजा कार्यक्रम आएको हो,’ उनले भने, ‘तर, विद्यालयले पास्ता, चाउचाउ, भुजाजस्ता खाजा खुवाउने गरेको पाइयो । तत्काल स्वस्थकर खाजा खुवाउन निर्देशन दिएको छु ।’
जिल्लाका सामुदायिक विद्यालयका शिक्षकहरू भने सातामा ६ दिन नै फरक–फरक परिकार बनाएर खुवाउने गरेको दाबी गर्छन् । खाजा तयार गर्ने कर्मचारीसमेतको व्यवस्था गर्नुपर्दा समस्या परेको उनीहरूको गुनासो छ । जनता माविका प्रधानाध्यापक अश्विनीकुमार पाठकले विद्यार्थीलाई मेनु नै बनाएर हरेक दिन फरक–फरक परिकार खुवाउने गरेको बताए । ‘हरेक दिन फरक खुवाइन्छ । कहिलेकाहीं विद्यार्थीको माग र कर्मचारीले छिटोछरितोका लागि प्याकेटवाला खाजा खुवाएका होलान्,’ उनले भने, ‘आगामी दिनमा खाजा स्वस्थकर र पोसिलो खुवाउनेमा थप पहल गर्नेछौं ।’ सामुदायिक विद्यालयमा प्रारम्भिक बाल कक्षादेखि कक्षा ५ सम्म अध्ययन गर्ने हरेक विद्यार्थीलाई दिवा खाजाको व्यवस्था छ ।
तर, जिल्लाका अधिकांश सामुदायिक विद्यालयले न मेनु तयार पारेका छन्, न त गुणस्तरमा नै ध्यान दिएका छन् । खाजा तयार पार्ने कर्मचारीको भरमा नै कार्यक्रम सञ्चालन भइरहेको छ । स्थानीय तह र शिक्षा शाखाको प्रभावकारी अनुगमन नहुँदा विद्यार्थी गुणस्तरीय खाजा खानबाट वञ्चित हुनुपरेको अभिभावकको गुनासो छ । ‘दिवा खाजाको विषयमा अभिभावक र स्थानीय तह दुवैले ध्यान दिएका छैनन्,’ बर्दघाट नगरपालिका–२ का देवीदत्त उपाध्यायले भने ।
जिल्लाका अधिकांश सामुदायिक बिद्यालयमा गुणस्तरहिन दिवा खाजा खुवाईरहेको अबिभावकको जनगुनासो छ । यसप्रति स्थानिय सरकारले सम्बन्धित बिद्यालयमा निरन्तर अनुगमन गर्ने जरुरी छ । बिद्यार्थीको स्वस्थ्यसंग खेलवार्ड गर्ने बिद्यालयलाई कानुनी दायरामा ल्याउने अभिभावकहरुको आवाज छ ।
