चितवन । नेपाली कांग्रेसका केन्द्रीय सदस्य दिनेश कोइराला पाँच वर्षका लागि पार्टीबाट निश्कासित भएका छन् । चितवन क्षेत्र नं.३ मा स्वतन्त्र उम्मेदवारी दिएर फिर्ता नलिएपछि पार्टीले पाँच वर्षका लागि निश्कासन गरेको हो ।
मुख्यसचिव कृष्णप्रसाद पौडेलले विज्ञप्ति जारी गर्दै पार्टी र गठबन्धनका आधिकारिक उम्मेदवारविरुद्व उम्मेदवार दिएका, प्रस्तावक बसेका र समर्थक रहेकाहरुलाई कारवाही गरिएको जानकारी दिएका छन् । यस्तै चितवन क्षेत्र नं.१ मा स्वतन्त्र उम्मेदवारी दिएका कांग्रेस महासमिति सदस्य राजेन्द्र बुर्लाकोटी पनि पाँच वर्षका लागि पार्टीबाट निश्कासित भएका छन् ।
बुर्लाकोटी र कोइरालालाई बुधबार दिउँसो १ बजेसम्म उम्मेदवारी फिर्ता लिन कांग्रेस चितवनले आग्रह गरेको थियो । तर उम्मेदवारी फिर्ता नलिएपछि कांग्रेस केन्द्रीय कार्यालयले एकमुष्ट रुपमा कारवाही गरेको हो । बुर्लाकोटी आफ्नै पार्टीबाट उम्मेदवार बनेका डा.विश्वनाथ पौडेलविरुद्ध बागी उम्मेदवारी दिएका छन् । क्षेत्र नं.३ मा भने गठबन्धनबाट माओवादी केन्द्रका डा.भोजराज अधिकारी उम्मेदवार छन् ।
मुख्यसचिव पौडेलकाअनुसार उम्मेदवारी फिर्ता लिन आग्रह गर्दा समेत उम्मेदवारी फिर्ता नलिएका बागी उम्मेदवार र निजको प्रस्तावक र समर्थकलाई पार्टी विधानको धारा ३४ (४) (क) बमोजिम पार्टीको सदस्य समेत नरहने गरी ५ बर्षका लागि निस्कासन गरिएको छ ।
