काठमाडौं । कुनै पदाधिकारी वा कर्मचारीले राजीनामा पेश गरेको भएमा त्यस्तो राजीनामा पेश गरेकै मितिबाट लागू हुने गरी स्वीकृत गर्न निर्वाचन आयोगले सम्बद्ध सबै निकायलाई निर्देशन दिएको छ ।
आयोगले उक्त निर्देशन कार्यान्वयनका लागि सहजीकरण गर्न प्रधानमन्त्री तथा मन्त्रिपरिषद्को कार्यालयमार्फत सबै सरकारी कार्यालयलाई लेखी पठाउने निर्णय गरेको आयोगले जनाएको हो ।
असोज २३ गते भन्दा अगाडि नेपाल सरकार, प्रदेश सरकार, स्थानीय तह, कुनै सरकारी वा अर्धसरकारी निकाय वा सार्वजनिक संस्था वा विश्वविद्यालय वा विद्यालय वा नेपाल सरकारको पूर्ण वा आंशिक स्वामित्व भएको संगठित संस्था वा नेपाल सरकारको अनुदान प्राप्त संस्थामा पारिश्रमिक पाउने गरी बहाल रहेको व्यक्तिले राजिनामा दिएर निर्वाचनमा उम्मेदवारी दिएको भए त्यस्ता व्यक्तिको राजिनामा स्वीकृत गर्न आयोगले सम्बद्ध निकायलाई निर्देशन दिएको हो ।
आयोगमा राजनीतिक दलले बुझाएको बन्दसूचीमा परेका उम्मेदवार मध्ये कतिपयले राजिनामा नदिएको र राजिनामा दिएको भए पनि स्वीकृत नभएको गुनासो आएपछि आयोगले यस्तो निर्देशन दिएको आयोगका समानुपातिकतर्फका प्रवक्तासमेत रहेका उपन्यायधिवक्ता गुरुराज वाग्लेले जानकारी दिए ।
