सप्तरी क्षेत्र नम्बर ४(क) को राष्ट्रिय रुपमा ख्याति प्राप्त स्वतन्त्र उमेदवार राजेश विद्रोही को हुन् ? उनका राजनीतिक समाजिक क्षेत्रमा के योगदान छ ? जनता उहाँलाई किन भोट हाल्न आतुर छन् ? हामीलाई प्राप्त भएको छोटो जानकारी यसप्रकार छ :
राजेश विद्रोहीको वास्तविक नाम राजदेव राम हो । उसको जन्म २०४२/२/२९ सप्तरी खडक नपा ३ गरुराहा गाउँमा भएको हो । जनयुद्धका सहिद उदयपुर कटारीका जामुन चौधरीको कान्छी छोरी पार्वती चौधरीसँग नेपालमा गणतन्त्र स्थापनाका दिन जनवादी विवाह भएको हो । उसका दुई छोरा छन् । जनमुक्ति सेनाबाट अवकाश लिएपछि सिरहाको लहानमा सस्तोमा एलानी जग्गा किनेर सामान्य जस्ताको घरमा जीवन चलाउँदै आएका छन् ।
शिक्षा मेडिकल तर्फ अहेब र एचए तथा राजनितीक शास्त्रमा मास्टर डिग्री गरेका छन् । राजनीतिक शास्त्रमा पिएचडी अध्ययनका लागि प्रक्रियामा छन् । जनयुद्धको क्रममा राखिएको नामले राष्ट्रिय स्तरमा स्थापित र ख्यातिप्राप्त नाम हुन राजेश विद्रोही ।
१२ वर्षको उमेरमा विधार्थी राजनीतिमा सहभागी भएर १६ वर्षको उमेरमा माओवादी जनयुद्धमा भूमिगत भएका थिए । जनमुक्ति सेनाको कमाण्डर समेत रहेका विद्रोही जनयुद्धमा डाक्टरको रुपमा थुप्रै युद्ध घाइतेहरुको जीवन दिएका छन् भने जनताको घरदैलोमा बस्ने क्रममा समेत उपचारको भूमिका निर्वाह गरेका छन् । पार्टी र जनयुद्धमा तल्लो स्तरदेखि केन्द्रीय स्तरसम्मका विभिन्न जिम्मेवारी समहालेका विद्रोही जनयुद्धमा घाइते समेत हुन् । समाजिक परिवर्तनका लागि जेलनेल समेत भोगेका खेपेका छन् । २५ वर्षदेखि निरन्तर रुपमा राजनीतिक क्षेत्रको अनुभव रहेको एक सक्षम र इमानदार पात्रको रुपमा स्थापित छन् ।
रक्तमुच्छेल अंकुरण, मुक्तिसंघर्ष, इजोत पुस्तकका लेखक, साहित्य लेखन क्षेत्रमा कविडाँडा साहित्य पुरस्कार लगायत दर्जन पुरस्कारबाट सम्मानित छन् । विभिन्न साहित्य संस्था तथा पत्रकारिता क्षेत्रमा १५ वर्षदेखि आवद्ध तथा सम्पादकका रुपमा समेत भूमिका निर्वाह गर्दै आएका छन् । कान्तिपुर, नयाँ पत्रिका, अन्पूर्णपोष्ट, रातोपाटी, अनलाइन खबर, टुडेखोज, नेत्रदैनिक, गाउँघरटडकम, हामी नेपालटडकम लगायतका दर्जनौ पत्रपत्रिकामा समयसापेक्ष राजनीतिक लेखहरु प्रकाशित भईरहेको हुन्छ । एभिन्युज, प्राइमटीभी,बागमती टीभी, न्युजनेपाल टिभी, हुलाकी न्युज टिभी लगायतका राष्ट्रिय टेलिभिजनहरुमा समेत समयसान्दर्भिक रुपमा राजनीतिक विश्लेषकको रुपमा अन्तर्वार्तामा विश्लेषकको रुपमा समेत परिचित छन् ।
समाजिक सेवाको क्षेत्रमा पनि लामो अनुभव रहेको छ । दलित लगायतका सिमान्तकृत वर्गको समस्या कुनै समुदाय विशेषको समस्या नभई साझा र राष्ट्रिय समस्याको रुपमा रहेको भनेर दुई वर्षदेखि चेतनामूलक अभियान राष्ट्रिय दलित मुक्ति जागरण अभियानका राष्ट्रिय संयोजक समेत नेतृत्व गर्दै आएका छन् ।
