काठमाडौँ । यति एयरलाइन्सको विमान पोखरा महानगरपालिका–१७ घारिपाटनस्थित सेतीको खोँचमा दुर्घटना भएको छ । एन एएनसी एटीआर विमान दुर्घटनास्थलबाट ३६ जनाको शव निकालिएको छ । दुर्घटनास्थलबाट निकालिएको शव पोखरास्थित गण्डकी अस्पतालमा राखिएको कास्कीका एसपी अजय केसीले रातोपाटीलाई बताए । आइतबार बिहान १० बजेर ३३ मिनेटमा काठमाडौं विमानस्थलबाट पोखरातर्फ उडेको थियो ।
विमानमा २ बच्चा, १० जना विदेशी सहित ६८ यात्रु सवार थिए । क्याप्टेन कमल केसीसहित चालक दलका ४ जना सदस्य सवार रहेको यति एयरलाइन्सले जानकारी दिएको छ । उद्धार कार्य जारी रहेको र काठमाडौँमा एयर एम्बुलेन्स र अस्पतालहरुसँग समन्वय गरिएको गण्डकी प्रदेशका डीआईजी रामदत्त जोशीले रातोपाटीलाई बताए । जोशीले भने– ‘घाइतेहरुको उपचारका लागि काठमाडौंमा एयर एम्बुलेन्स र अस्पतालसँग समन्वय गरेका छौं ।’ उद्धारमा नेपाल प्रहरी, सेना र सशस्त्र प्रहरी खटिएका छन् ।
