बिरगंज। पार्टी कार्यक्रमका लागि बाराको कलैया पुगेका नेकपा एमालेका अध्यक्ष केपी शर्मा ओलीका विरुद्ध साझा जागरण अभियानले कालो झण्डा सहितको विरोध प्रदर्शन गरेका छन् ।
नेकपा एमाले तथा अध्यक्ष केपी शर्मा ओली भूमिहीन सुकुम्बासी, लघुवित तथा मिटरब्याजीहरुको संरक्षण रहेको भनेर उनीहरुले बाराको सदरमुकाम कलैयामा कार्यक्रमकै दिन काले झण्डा सहितको विरोध प्रदर्शन गरेका छन् ।
जागरण अभियानले पीडितहरुको पक्षमा पैरवी र आन्दोलन गर्दा नेकपा एमालेका नेताकार्यकर्ता तथा संगठनले पीडक तथा साहुहरुको संरक्षण गरेकाले विरोधमा उत्रिएको जागरणका बारा संयोजक प्रकाश चौधरीले जानकारी दिएका छन् । अधिकांश साहु, लघुवित र सहकारी एमालेकै नेताकार्यकर्ताले खोलेर गरिब जनता लुटिएको उनले थपे ।
देशैभरी चल्ने विभिन्न क्षेत्रको समस्या समाधानका लागि तहगत र मोर्चागत रुपमा पाँच वर्षदेखि संघर्षमा रहेका विभिन्न जागरण र अभियान तथा संघर्षको केन्द्रीय संयोजकको रुपमा संयोजनको भूमिका राजेश विद्रोहीले गर्दै आएका छन् । विद्रोहीको नेतृत्वमा राष्ट्रिय दलित मुक्ति जागरण अभियान, साझा जागरण अभियान, लघुवित तथा मिटरब्याज सम्बन्धी संघर्ष समिति, दलित संघर्ष समिति लगायतका जागरण अभियान तथा मोर्चाहरु चलाइरहेका छन् ।
नेकपा एमालेको मुख्य समर्थनमा बनेको वर्तमान प्रचण्ड नेतृत्वको सरकारले आफ्नो पक्षहरुसँग गरेको सहमति र सम्झौताहरु पालना नगरेको र पीडकहरुलाई नै पक्षपोषण गरेकाले आफूहरू सरकार र प्रमुख दलहरुको विरुद्धमा उत्रिनुपर्ने बाध्यता भएको जागरणका सिम्रोनगढ नगरपालिका प्रमुख कंचन पासवानले बताए ।
आयोग र समितिहरु मात्र थपेर आफूहरुको समस्या समाधान नगरी आफ्नो नेताकार्यकर्ता पाल्ने र समस्यालाई भोट बैंकको रुपमा प्रयोग गर्ने नियतले ग्रसित देशका मुख्य दल र सरकारको विरुद्ध संघर्षको विकल्प नरहेको जागरणका सचिव सिकिन्द्र कुशवाहाले बताए ।
