लहान।सिरहाबाट भारततर्फ लैजान खोजिएको अवैध मदिरा सशस्त्र प्रहरीले नियन्त्रणमा लिएको छ। सिरहा नगरपालिका-१५, बुधौरास्थित सशस्त्र प्रहरीको टोलीले भन्सार छलि गरेर लैजान लागिएको ‘सोफी’ ब्रान्डको मदिरा जफत गरेको हो। यस क्रममा तस्करीमा प्रयोग गरिएका तीनवटा भारतीय नम्बर प्लेटका मोटरसाइकलहरू पनि सशस्त्र प्रहरीले नियन्त्रणमा लिएको छ।
सशस्त्र प्रहरी उपरीक्षक शिव गैरेका अनुसार, मदिरा भन्सार प्रक्रियाबिना चोरी पैठारी गरेर भारत पठाउन खोजिएको थियो। सशस्त्र प्रहरीको सक्रियताका कारण उक्त मदिरा समयमै नियन्त्रणमा लिन सफल भएको उनले बताए। पक्राउ गरिएको मदिराको बजार मूल्य करिब ८१ हजार रुपैयाँ बराबर रहेको छ।
सशस्त्र प्रहरी प्रमुख गैरेले भने, “भन्सार छलि गरेर अवैध रूपमा मदिरा लैजान खोजिएको थियो। हाम्रो टोलीले समयमै कारबाही गरेर नियन्त्रणमा लियो।” घटनामा सम्लग्न मदिरा र मोटरसाइकलहरूलाई कानुनी कारबाहीका लागि भन्सार कार्यालयमा बुझाइएको छ।
सिरहा जिल्ला भारतसँगको सीमावर्ती क्षेत्र भएकोले यहाँ यस्ता अवैध तस्करीका घटनाहरू प्रायः देखिने गरेका छन्। मदिरा, लागूऔषध, र अन्य भन्सार छलिएका सामग्रीहरूको तस्करी सीमा नाकाबाट हुने गरेको छ। यस्ता गतिविधि नियन्त्रण गर्न सशस्त्र प्रहरी सक्रिय रहेको छ र आगामी दिनमा सीमा क्षेत्रमा निगरानी अझै कडा पार्ने योजना रहेको पनि बताइएको छ।
यसअघि पनि सिरहाका विभिन्न नाकाहरूबाट अवैध मदिरा तथा अन्य सामग्रीको तस्करी भएको थुप्रै घटनाहरू सार्वजनिक भइसकेका छन्। यस्ता गैरकानुनी क्रियाकलाप नियन्त्रण गर्न सशस्त्र प्रहरी र भन्सार कार्यालयले संयुक्त रूपमा अभियान सञ्चालन गरिरहेको छ।
सशस्त्र प्रहरीले नागरिकलाई पनि यस्ता अवैध गतिविधिहरूको सूचना दिन र कानुनी प्रक्रियामा सहयोग गर्न अपील गरेको छ।
