राजबिराज । मधेशी एकता समाजले संयुक्त अरब इमिरेट्समा वैदेशिक रोजगारीको क्रममा मृत्यु भएका नेपाली नागरिक योगेन्द्र भेडिहरको परिवारलाई १ लाख ५० हजार रुपैया आर्थिक सहयोग गरेको छ ।
समाजको नेपाल इकाईकी अध्यक्ष डा. बबीसिंह यादवले फागुन ११ गते बुधबार धनुषाको सबैला नगरपालिका १२, रघुनाथपुरमा रहेको मृतक भेडिहरको घरमा पुगेर उनकी पत्नी रुबी राउतलाई एक लाख ४० हजारको चेक र १० हजार रुपैया नगद हस्तान्तरण गरेकी हुन् । मृतकका श्रीमती र नौ महिनाकी छोरी छन् भने परिवारको आर्थिक अवस्था अत्यन्तै कमजोर छ ।
मधेशी एकता समाजका संस्थापक एवं सल्लाहकार डा. रवीन्द्रकुमार यादवका अनुसार मृतकको शवलाई नेपाल फर्काउने काममा समेत समाजले आर्थिक सहयोग गरेको थियो । मधेशी एकता समाज संसारभरि छरिएर रहेका नेपालका मधेशी प्रवासीहरूमाझ एकताको भावनालाई सञ्चार गर्दै उनीहरूको सुखदुःखमा सदासर्वदा साथ दिन सन् २०२१ मा दुबईमा स्थापना भएको हो ।
मृतक भेडिहार भ्रमण भिसामा युएई गएका थिए । भ्रमण भिसामै रहेको बेला उनले जागिर पाए । तर श्रम स्वीकृति र जीवन बीमासहित अन्य कागजात उनीसँग थिएन ।
सधैझैँ कामबाट फर्किएर राति सुत्न गएका भेडिहारको पुस ५ गते राति सुतिरहेकै ठाउँमा मृत्यु भएको थियो । कागज दुरुस्त नभएकोले उनको शवलाई नेपाल फर्काउन निकै कठिनाइ भयो । मृतक भेडिहारले काम गर्ने कम्पनीले आवश्यक कागजातको अभाव र कानुनी व्यवस्थाका कारण उनको शवलाई स्वदेश पठाउन अस्वीकार गर्याे ।
मृतकसँग श्रम स्वीकृति, बीमालगायत कागजात नरहेकोले पहलकर्ताले प्रशासनिक कठिनाइका साथै आर्थिक कठिनाइको सामना गर्नुपरेको थियो। विभिन्न संस्थाहरूले हातेमालो गर्दै उनको शवलाई नेपाल फर्काउने अभियान शुरू गरेका थिए । त्यसमा जोडिँदै मधेशी एकता समाजका उपाध्यक्ष श्रीकृष्ण ठाकुरले सम्पूर्ण कानुनी प्रक्रिया पूरा गरी मृतकको शवलाई फागुन ४ गते राति नेपाल वायु सेवा निगमको जहाजबाट स्वदेश पठाउन महत्वपूर्ण भूमिका निर्वाह गरेका थिए।
