सिरहा, १० कात्तिक — पूर्वमन्त्री एवं नेकपा (एमाले)का नेता लिलानाथ श्रेष्ठले हालको सरकारले मधेसको विकासलाई विशेष प्राथमिकता दिएको बताएका छन्। सिरहाको नवराजपुरमा आयोजित विजयादशमी, दीपावली, छठपर्व तथा इदको अवसरमा आयोजित कार्यक्रमलाई सम्बोधन गर्दै नेता श्रेष्ठले सरकारद्वारा हुलाकी सडक, नाली निर्माण, पालिका भवन निर्माण लगायतका पूर्वाधार परियोजनामा जोड दिइएको जानकारी दिए।
श्रेष्ठले तराई-मधेस समृद्धि कार्यक्रमअन्तर्गत सुनकोसी कमला डाइभर्सन परियोजना मधेसका किसानहरूको उत्थानको लागि महत्वपूर्ण रहेको र यस परियोजनाले मधेसको हजारौं बिघा खेतीयोग्य जमिनलाई सिँचाइ सुविधा उपलब्ध गराउने विश्वास व्यक्त गरे। उनका अनुसार संघीय सरकारले यस योजनालाई तीव्रता दिन विशेष ध्यान दिएको छ।
मधेस प्रदेशका स्वास्थ्य तथा जनसंख्या मन्त्री शत्रुधनप्रसाद सिंहले प्रदेशका हरेक स्थानीय तहमा सुविधासम्पन्न अस्पताल स्थापना गरी गुणस्तरीय स्वास्थ्य सेवा प्रवाहमा प्रदेश सरकार लागिपरेको जानकारी गराए। यस कार्यक्रममा स्थानीय सांसद श्यामशङ्कर यादव, गङ्गाप्रसाद यादव, संविधानसभा सदस्य आशाकुमारी यादव, एमाले मधेस प्रदेश अध्यक्ष चन्द्रेश्वर मण्डल लगायतले सिरहाको समग्र विकासमा एकताका साथ लाग्न सबैलाई आह्वान गरे।
कार्यक्रममा सिरहा नगरपालिका प्रमुख डा. नवीनकुमार यादव, सुखीपुर नगर प्रमुख रामअवतार यादव, भगवानपुर गाउँपालिका अध्यक्ष उग्रनारायण यादव, नवराजपुर गाउँपालिका अध्यक्ष शिव उदगार यादव, र सखुवानन्कारकट्टी गाउँपालिका अध्यक्ष केदारनाथ यादवको उपस्थिति थियो। सबैले मधेस क्षेत्रको विकासलाई प्राथमिकतामा राखेर काम गर्न प्रतिबद्धता व्यक्त गरेका छन्।
