लहान ।सिरहाको नवराजपुर गाउँपालिका–१ भगवतीपुरमा किशोरी रिङ्कुकुमारी सदाको रहस्यमयी मृत्यु प्रकरणमा प्रहरीले अनुसन्धानलाई तीव्र बनाउँदै आठजनालाई नियन्त्रणमा लिएको छ।
छानबिन समितिका संयोजक वरिष्ठ प्रहरी उपरीक्षक शान्तिराज कोइरालाका अनुसार नियन्त्रणमा लिइएका व्यक्तिहरू पञ्चायतमा संलग्न, प्रत्यक्षदर्शी र घटनालाई मिलाउन दबाब दिनेहरू हुन्। अनुसन्धानको क्रममा उनीहरूले आर्थिक प्रलोभनमार्फत पीडित परिवारलाई घटनालाई दबाउन बाध्य पारेको सम्भावना रहेको भन्दै प्रहरीले आवश्यक प्रमाण संकलन गरिरहेको छ।
प्रारम्भिक अनुसन्धान अनुसार, माघ २७ गते राति शौच गर्न बाहिर निस्किएकी रिङ्कुलाई अपहरण गरी सामूहिक बलात्कार गरिएको थियो। अचेत अवस्थामा घर फर्काइएकी उनले आफूमाथि बलात्कार भएको जानकारी परिवारलाई दिएकी थिइन्। तर, घटनालाई दबाउन स्थानीय तहबाट पहल गरिँदै गाउँमै पञ्चायत बसेको खुलासा भएको छ।
माघ ३० गते उनको शव झुन्डिएको अवस्थामा भेटिएको थियो। सुरुमा आत्महत्या दुरुत्साहन मुद्दामा अनुसन्धान गरिए पनि बलात्कारको तथ्य बाहिर आएपछि मधेश प्रदेश प्रहरी कार्यालयले नयाँ समिति गठन गरी अनुसन्धानलाई थप गहिराइमा लैजाने निर्णय गरेको हो।
पीडित परिवारले बलात्कारमा संलग्न तीन जना र दबाब दिने पाँच जना गरी आठ जनाविरुद्ध कर्तव्य ज्यान, जबरजस्ती करणी, शरीर बन्धक तथा लेनदेन मिलापत्रसम्बन्धी जाहेरी दिएका छन्। जाहेरीमा नाम उल्लेख गरिएका व्यक्तिहरू भने हालसम्म पक्राउ परेका छैनन्।
शव परीक्षणका लागि बिपी कोइराला स्वास्थ्य विज्ञान प्रतिष्ठान धरानमा पठाइएको भए पनि अहिलेसम्म रिपोर्ट सार्वजनिक नभएको प्रहरी स्रोतले जनाएको छ। अनुसन्धानको निष्कर्षपछि दोषीमाथि कडा कानुनी कारबाही अघि बढाइने बताइएको छ।
