राजविराज २० बैशाख । सप्तरीको खड्क नगरपालिकामा कुनै राजनीतिक दलले प्रमुख उपप्रमुख पदमा दलित समुदायलाई टिकेट नदिएपछि आफ्नो समुदायको रक्षाका लागि मेयर पदमा रामनाथ मण्डल र उपमेयर पदमा ममता कुमारी रामले स्वतन्त्र उमेदवारी दिएका छन् ।
मधेस प्रदेशमा करोनाकालमा थुप्रै दलितहरूको हत्या भयो । तर कुनै पनि राजनीतिक दलले यो मुद्दालाई प्राथमिकतामा राखेन । अहिले पनि पीडित परिवारहरुले न्याय पाएको छैन् । दलित आन्दोलनकै क्रममा देशभरिका दलितहरू आन्दोलित भए । पूर्वमा सप्तरी दलित आन्दोलनको केन्द्रको रुपमा मानिन्छ । खड्क नगरपालिकामा ११ वटै वडामा दलितहरुको बलियो संगठन छ । हरेक राष्ट्रिय दलमा दलितहरु लागेका छन् । तर चर्को विभेदको कारण यसपटक कसैले चुनावमा टिकेट दिएन ।
रामनाथ मण्डल भन्छन्, दलितको अस्तित्व संकटमा पर्यो । यसको रक्षा गर्ने दायित्व हाम्रो काधमा आयो र स्वतन्त्र रुपमा उमेदवारी दिए । यहाँ ८ लाख दलित छन् । दलितले मात्र हामीलाई भोट दियो भने हामी दुबै उमेदवार जित्ने निश्चित छ । यसमा हामी ढुक्क छौ । ममता भन्छिन्, दलितमाथि सबैखाले विभेद छ । अब त राजनीतिक रुपमा पनि विभेद सुरु भएको छ । जुन राजनीतिले परिवर्तन गर्ने भन्यो त्यही राजनीतिले दलितलाई विभेदको खाल्डो खन्दैछ । हामी यसलाई रक्षा गर्छौं ।
