महेश सिंह लहान, सिरहा –जिल्ला ट्राफिक प्रहरी कार्यालय, सिरहा लहानका इञ्चार्ज पोषण राज थपलिया प्रहरी निरीक्षकबाट प्रहरी नायब उपरीक्षक (डीएसपी) मा पदोन्नति भएका छन्। प्रहरी प्रधान कार्यालयले प्रकाशित गरेको सूचनामा कार्यकुशलता, अनुशासन, निष्ठा र उपलब्धि मूल्यांकनको आधारमा थपलियालाई बडुवा गरिएको उल्लेख छ।
थपलियाको नेतृत्वमा सिरहामा सडक दुर्घटना नियन्त्रणमा उल्लेखनीय सुधार आएको थियो। ‘आँपपछि दुर्घटना न्यूनीकरण’ अभियानमार्फत उनले जिल्लामा ट्राफिक व्यवस्थापन र नागरिक चेतना अभिवृद्धिमा खास सफलता हासिल गरेका थिए। ट्राफिक नियम उल्लङ्घनमा कडाइ, ट्राफिक शिक्षा कार्यक्रम, र जनसहभागितामूलक अभियानहरू सञ्चालन गर्दै उनले जिल्ला भरि सडक सुरक्षा प्रवर्द्धनमा उदाहरणीय कार्य गरेका हुन्।
प्रहरी प्रधान कार्यालयका अनुसार उनले उच्च कार्यसम्पादन अङ्क प्राप्त गरेका थिए, जसका कारण योग्य उम्मेदवारका रूपमा डीएसपीमा पदोन्नत गरिएको हो।
थपलियाको बडुवाले ट्राफिक व्यवस्थापनमा समर्पित प्रहरी अधिकारीहरूलाई प्रेरणा मिल्ने विश्वास गरिएको छ। स्थानीयवासी, जनप्रतिनिधि र सामाजिक अभियन्ताहरूले उनको योगदानको खुलेर प्रशंसा गर्दै थप सफलताको शुभकामना व्यक्त गरेका छन्।
