महेश सिंह लहान सिराहा –दलित समुदायको हक–अधिकार, सशक्तीकरण र सामाजिक न्यायका मुद्दालाई संस्थागत रूपमा अघि बढाउने उद्देश्यले संयुक्त दलित संघर्ष समिति, लहान–सिरहा पुनर्गठन गरिएको छ। ‘सम्पूर्ण दलित एक समाज’ भन्ने मूल नारासहित सम्पन्न पुनर्गठनसभाले नयाँ नेतृत्वलाई सर्वसम्मत रूपमा अनुमोदन गरेको हो।
कार्यक्रमका प्रमुख अतिथि पुराना दलित अगुवा डिल्ले मिझार तथा महनथी राम रहेका थिए। उनीहरूले दलित समुदाय अझै पनि सामाजिक, आर्थिक तथा संरचनागत असमानताबाट प्रभावित भएकाले शिक्षा, संगठन र निरन्तर संघर्षमार्फत सशक्तीकरण अनिवार्य रहेको उल्लेख गरे।
समितिको पुनर्गठनबाट टिकराम मोचि अध्यक्ष र मंगल पासवान सचिव चयन भएका छन्। पुनर्गठन प्रक्रियामा कुनै पनि पदमा प्रतिस्पर्धा नभई सबै पदाधिकारीहरू सर्वसम्मत रूपमा जिम्मेवारीमा आएको कार्यक्रम संयोजकले बताए।
२०८२ मंसिर ६ मा सम्पन्न कार्यक्रममा ‘शिक्षित बनौँ, संगठित रहौँ, संघर्ष गरौँ’ जस्ता नारामार्फत समुदायलाई समान अधिकार प्राप्तिका लागि एकजुट हुन आह्वान गरिएको थियो।
कार्यक्रमको आयोजना संयुक्त दलित संघर्ष समिति, लहान–सिरहा ले गरेको थियो भने सहयोगमा दलित जनकल्याण युवाक्लब, लहान–सिरहा रहेको थियो। आयोजकका अनुसार कार्यक्रममा लहान तथा आसपासका दलित बस्तीहरूबाट उल्लेखनीय उपस्थिति रह्यो।
पुनर्गठित समितिको नामावली
अध्यक्ष — टिकराम मोचि
सचिव — मंगल पासवान
सह–सचिव — संजिव कुमार राम
कोषाध्यक्ष — कामिनी देवी पासवान
सदस्यहरू
– मिथिलेश राम
– बुलियन राम
– जेना देवी
– शान्ति कुमारी
– नवल कुमार पासवान
– कृष्णकुमार पासवान
– सुनिता कुमारी
– श्याम देवी पासवान
पुनर्गठित समितिले दलित समुदायको सामाजिक न्याय, अवसरको समान पहुँच, भेदभाव उन्मूलन तथा सक्षम संगठन निर्माणलाई प्राथमिकतामा राख्दै आगामी दिनहरूमा सक्रिय अभियान सञ्चालन गर्ने प्रतिबद्धता जनाएको छ।
