महेश सिंह, लहान सिरहा — ग्लोबल एस.एस. कलेजले कक्षा ११ मा नयाँ भर्ना भएका विद्यार्थीहरूका लागि मंगलबार लहान–७ स्थित मारवाडी सेवा सदनमा भव्य स्वागत कार्यक्रम सम्पन्न गरेको छ। कार्यक्रम विद्यार्थी, अभिभावक र कलेज परिवारको उत्साहजनक सहभागितामा सम्पन्न भएको कलेजका प्रिन्सिपल भोला जित नेपालले बताए।
कार्यक्रम कलेजका प्रिन्सिपल नेपालकै आतिथ्यतामा सुरु भएको थियो। प्याब्सन सिरहाका अध्यक्ष उमेश चौधरी प्रमुख अतिथि थिए भने उपाध्यक्ष उमेश यादव, उच्च शिक्षा परिषदका प्रतिनिधि तराकान्त पण्डित, विभिन्न विद्यालय र वित्तीय संस्थाका प्रतिनिधि तथा सञ्चारकर्मीहरूको उल्लेखनीय उपस्थिति रहेको आयोजकले जनाएको छ।
प्रमुख अतिथि चौधरीले “लहानलाई शिक्षाको हबका रूपमा विकास गर्न सबै क्षेत्रको साझा भूमिका आवश्यक छ” भन्दै कलेजको शैक्षिक प्रगतिले भविष्यमा अझ उत्कृष्टता कायम राख्ने विश्वास व्यक्त गरे।
कलेजले Science, Computer Science, Management र Hotel Management रहेका शैक्षिक कार्यक्रम, कक्षा सञ्चालन पद्धति, विद्यार्थीलाई उपलब्ध गराइने सुविधा तथा आगामी शैक्षिक योजनाबारे विस्तृत जानकारीसमेत सार्वजनिक गर्यो।
नयाँ विद्यार्थीहरूलाई खादा–टिका लगाई स्वागत गरिएको थियो। सो अवसरमा विद्यार्थीहरूले सन्देशमुखी नृत्य, झाँकी तथा सांस्कृतिक प्रस्तुति दिए, जसले कार्यक्रममा उत्साह थपेको सहभागीहरूले बताएका छन्।
रंगीन फूलसज्जा र आकर्षक ब्यानरले सजिएको मञ्चले कार्यक्रमलाई भव्य बनाएको थियो। कार्यक्रमले विद्यार्थीहरूमा आत्मविश्वास बढाउनका साथै कलेज जीवनप्रति सकारात्मक दृष्टिकोण विकास गर्न सहयोग पुर्याएको कलेज प्रशासनले जनाएको छ।
