महेश सिंह लहान सिरहा-“अनुशासन नै राष्ट्र सेवाको मूल जग हो” भन्ने मूल नारासहित एन.सि.सि अल्मुनाई एशोसिएशन नेपाल सिरहाको आयोजनामा ८औँ वार्षिकोत्सव कार्यक्रम सिरहाको सीमावर्ती गाउँपालिका–४ स्थित जनता नमुना प्राविधिक धार माध्यमिक विद्यालय, सोनवर्सामा भव्य रूपमा सम्पन्न भएको छ।
विद्यालयका प्रधानाध्यापक मुरारी शर्माको अध्यक्षतामा सम्पन्न कार्यक्रममा सिरहा चोहर्वा गणका सेनानी समीर श्रेष्ठ प्रमुख अतिथिका रूपमा उपस्थित रहनु भएको थियो। कार्यक्रममा बोल्दै प्रमुख अतिथि सेनानी श्रेष्ठले अनुशासन, राष्ट्रप्रेम र नेतृत्व विकासमा एन.सि.सि तालिमको महत्वपूर्ण भूमिका रहेको उल्लेख गर्नुभयो। उहाँले युवाहरूलाई अनुशासित, जिम्मेवार र राष्ट्र सेवाप्रति समर्पित बनाउने माध्यमका रूपमा एन.सि.सि प्रभावकारी रहेको धारणा राख्नुभयो।
कार्यक्रममा पूर्व मेजर दिपेन्द्र सिंह, एन.सि.सि अल्मुनाई एशोसिएशन नेपाल मधेस प्रदेश सचिव लक्ष्मण शर्मा, विशिष्ट अतिथिका रूपमा गाउँपालिका अध्यक्ष शिव उदगार यादव, उपाध्यक्ष पुनःदेवी यादव, वडा नम्बर–२ का अध्यक्ष सुरेश कुमार यादव, वडा नम्बर–३ का अध्यक्ष बंशी लाल यादवलगायत विभिन्न राजनीतिक, सामाजिक तथा शैक्षिक क्षेत्रका व्यक्तित्वहरूको उल्लेखनीय उपस्थिति रहेको थियो।
कार्यक्रममा बोल्दै प्रदेश सचिव लक्ष्मण शर्माले एन.सि.सि तालिमले विद्यार्थीहरूलाई शारीरिक रूपमा स्वस्थ, मानसिक रूपमा सक्षम तथा अनुशासित बनाउने मात्र नभई सरकारी सेवामा प्रवेशका लागि अवसरको ढोका खोल्ने माध्यमसमेत बन्ने बताउनुभयो।
उहाँका अनुसार यस तालिमले व्यक्तिको आचरण,नेतृत्व क्षमता र सामाजिक जिम्मेवारी बोधमा सकारात्मक परिवर्तन ल्याउने गर्दछ। कार्यक्रमको अवसरमा प्रशिक्षित विद्यार्थीहरूले तालिमका क्रममा सिकेका विभिन्न सीप तथा अनुशासन सम्बन्धी कला प्रदर्शन गरी दर्शकको मन जितेका थिए। स्थानीय तह,विद्यालय प्रशासन तथा अभिभावकहरूले यस्ता कार्यक्रमले युवाहरूलाई सही दिशातर्फ डाेर्याउने विश्वास व्यक्त गरेका छन्।
एन.सि.सि अल्मुनाई एशोसिएशन नेपाल सिरहाले हरेक वर्ष निरन्तर रूपमा यस्ता कार्यक्रम गर्दै आएको र आगामी दिनमा पनि युवाको व्यक्तित्व विकास तथा राष्ट्र सेवाको भावना अभिवृद्धि गर्ने कार्यक्रमलाई थप विस्तार गर्दै लैजाने जनाएको छ।
