महेश सिंह,लहान सिरहा -युवा नेतृत्वको क्षमता अभिवृद्धि गर्दै भविष्यका सक्षम नेतृत्व तयार गर्ने उद्देश्यले जेसीआई लहान सिटीको समन्वयमा बहुच्याप्टर नेतृत्व विकास तालिम ‘Training for Forthcoming Leaders’ शनिबार लहानमा आयोजना गरिएको छ।
लहान–११ स्थित आगमन होटल एण्ड पार्टी प्यालेसमा सम्पन्न तालिममा जेसीआई लहान सिटी, राजविराज, गोलबजार, उदयपुर, जनकपुरधाम र मलंगवाका सदस्यहरूको सहभागिता रहेको थियो।
कार्यक्रमको उद्देश्य सहभागीहरूमा नेतृत्व क्षमता, व्यक्तित्व विकास, प्रभावकारी सञ्चार, संगठन सञ्चालन तथा जिम्मेवार नेतृत्वका लागि आवश्यक सीप अभिवृद्धि गर्नु रहेको आयोजकले जनाएको छ। विभिन्न अनुभवी प्रशिक्षकहरूले नेतृत्व विकास, निर्णय क्षमता, टोली व्यवस्थापन, प्रेरणा तथा जेसीआईको मूल्य र उद्देश्यसम्बन्धी प्रशिक्षण दिएका थिए।
कार्यक्रममा सहभागीहरूले यस्ता बहुच्याप्टर तालिमले विभिन्न शाखाबीच अनुभव आदान–प्रदान, नेटवर्क विस्तार तथा संस्थागत सहकार्यलाई थप मजबुत बनाउने विश्वास व्यक्त गरेका छन्। आयोजकका अनुसार भविष्यमा पनि युवालाई सक्षम, जिम्मेवार र समाजप्रति उत्तरदायी नेतृत्वका रूपमा विकास गर्ने लक्ष्यसहित यस्ता तालिमलाई निरन्तरता दिइनेछ।
