महेश सिंह लहान सिरहा- सुनसरीको देवानगञ्जबाट सुरु भएको आन्दोलन मधेस प्रदेशका लहान, गोलबजारलगायतका क्षेत्रमा समेत फैलिएको क्रममा मृत्यु भएका सिरहाको औरही गाउँपालिका–२ तुलसीपुरका विद्यार्थी गणेश यादवको परिवारलाई विश्व हिन्दु परिषद् नेपाल, सिरहा जिल्ला कार्यसमितिले आर्थिक सहयोग गरेको छ।
परिषद्ले गणेश यादवको परिवारलाई १ लाख रुपैयाँ र आन्दोलनका क्रममा घाइते भएका सुभाष कुमार ठाकुरको उपचारका लागि ११ हजार रुपैयाँ सहयोग गरेको हो। मृतक र घाइते परिवारलाई गरी परिषद्ले कुल १ लाख ११ हजार रुपैयाँ आर्थिक सहयोग गरेको जिल्ला अध्यक्ष शिवदेव साहले जानकारी दिए।
विश्व हिन्दु परिषद् नेपालका केन्द्रीय समितिको रोहबरमा जिल्ला अध्यक्ष साहले गणेशका बुबा रामवृक्ष यादव र आमा बबिता देवी यादवलाई १ लाख रुपैयाँ नगदसहित श्रद्धाञ्जली पत्र हस्तान्तरण गरेका थिए। घाइते सुभाष कुमार ठाकुरको उपचारमा सहयोग पुगोस् भन्ने उद्देश्यले उनको परिवारलाई ११ हजार रुपैयाँ प्रदान गरिएको परिषद्ले जनाएको छ।
गणेश यादवको १३औँ दिनको पुण्यतिथिका अवसरमा जिल्ला अध्यक्ष साहको नेतृत्वमा परिषद्का पदाधिकारी तथा सदस्यहरू तुलसीपुरस्थित यादवको घरमा पुगेका थिए। उनीहरूले गणेशको तस्बिरमा फूल तथा अबिर अर्पण गर्दै श्रद्धाञ्जली व्यक्त गरेका थिए। सो क्रममा शोकाकुल परिवारप्रति समवेदना व्यक्त गर्दै आगामी दिनमा पनि आवश्यक सहयोग र साथ रहने प्रतिबद्धता जनाइएको थियो।
सहयोग हस्तान्तरण तथा श्रद्धाञ्जली कार्यक्रममा विश्व हिन्दु परिषद् नेपालका राष्ट्रिय उपाध्यक्ष रघुनाथ प्रसाद साह, मधेस प्रदेश अध्यक्ष रामबिलास राय, मधेस प्रदेश सचिव रुपकुमार न्यौपाने, मधेस प्रदेश संगठन सचिव जंगबहादुर सिंह, मधेस प्रदेश महिला प्रमुख सुनिता ठाकुर, जानकी विभाग सचिव रघुनाथ प्रसाद महतो, धनुषा जिल्ला अध्यक्ष सन्तोष कुमार साह र धनुषा जिल्ला सदस्य राजेन्द्रप्रसाद यादवलगायतको उपस्थिति थियो।
त्यस्तै, परिषद् सिरहा जिल्ला कार्यसमितिका अध्यक्ष शिवदेव साह, कोषाध्यक्ष ज्ञानेन्द्र विक्रम यादव, सत्संग प्रमुख शिवराम यादव, सातम यादव, लक्ष्मी यादव, प्रियरञ्जन उपाध्यक्ष, सतीश यादव, रामलोचन साह र पवनकुमार यादवलगायतको सहभागिता थियो।
परिषद्का जिल्ला अध्यक्ष साहले आन्दोलनका क्रममा ज्यान गुमाएका गणेश यादवको परिवार र घाइते सुभाष कुमार ठाकुरलाई सहयोग गर्नु सामाजिक दायित्वसमेत भएको बताए। उनले पीडित परिवारलाई आगामी दिनमा पनि आवश्यक सहयोगका लागि परिषद् साथमा रहने प्रतिबद्धता जनाए।
यसैबीच, गोलबजारमा भएको आन्दोलनका क्रममा गोली कसले चलाएको भन्ने विषयमा भने हालसम्म आधिकारिक पुष्टि हुन सकेको छैन। घटनामा गोली चलेको र त्यसबाट मानवीय क्षति भएको भए पनि गोली चलाउने व्यक्ति वा पक्षबारे सम्बन्धित निकायबाट आधिकारिक विवरण सार्वजनिक हुन बाँकी रहेको बुझिएको छ। घटनाको सत्यतथ्य अनुसन्धानपछि मात्रै स्पष्ट हुने देखिन्छ।
