महेश सिंह लहान सिरहा – विश्व हिन्दू परिषद् नेपालको आयोजनामा सिरहाको बरियारपट्टीमा जिल्ला स्तरीय वार्षिक योजना बैठक–२०८३ सम्पन्न भएको छ। बरियारपट्टी गाउँपालिका–१, नरगी चौकस्थित सामुदायिक भवनमा भाद्र शुक्ल पक्ष द्वितीया (भाद्र २८ गते) का दिन आयोजित बैठक परिषद्का सिरहा जिल्ला अध्यक्ष शिवदेव साहको अध्यक्षतामा सम्पन्न भएको हो।
कार्यक्रममा वरिष्ठ महन्थ लक्ष्मण दास बाबाको विशिष्ट उपस्थिति रहेको थियो। बैठकमा सिरहा जिल्लाका साथै मधेस प्रदेशका विभिन्न स्थानहरूबाट धार्मिक, सामाजिक तथा सांगठनिक व्यक्तित्वहरूको उल्लेख्य सहभागिता रहेको आयोजकले जनाएको छ।
बैठकका अवसरमा हिन्दू युवाहरूलाई धर्म तथा संस्कृतिप्रति थप निष्ठावान् र जिम्मेवार बनाउने विषयमा विशेष छलफल गरियो। युवा पुस्तालाई धर्म रक्षाको अभियानमा गोलबन्द गर्न उनीहरूलाई सीपमूलक शिक्षा, प्राविधिक तालिम र स्वरोजगारका अवसरहरूसँग जोड्नुपर्नेमा वक्ताहरूले जोड दिए। युवा वर्ग आत्मनिर्भर र सक्षम बने मात्र धार्मिक तथा सामाजिक जागरण प्रभावकारी हुने बैठकको निष्कर्ष थियो।
“मम दीक्षा हिन्दू रक्षा, मम मन्त्र समानता” भन्ने सांगठनिक मूल ध्येयका साथ आयोजित उक्त बैठकले आगामी वर्षका लागि धर्म संरक्षण, सामाजिक सद्भाव, युवा सशक्तिकरण र सांगठनिक विस्तारसम्बन्धी विभिन्न वार्षिक कार्ययोजनाहरूसमेत पारित गरेको छ।
