लहान१५ असोज ।११ क्विन्टलभन्दा बढी प्रतिबन्धित लागुऔषध गाँजा र दुईवटा सवारीसाधन प्रहरीले नियन्त्रणमा लिएको छ।
सिराहाको सुखीपुर नगरपालिका–१० विश्वकर्माचोकस्थित गागन खोलापुलबाट सशस्त्र प्रहरीले उक्त गाँजा बरामद गरेको हो।
विशेष सूचनाका आधारमा सशस्त्र प्रहरी बल नेपाल नं. ७ गण हेडक्वार्टर सिरहा, सुरक्षा बेस गोलबजार र सुरक्षा बेस सुखीपुरबाट खटिएको २९ जनाको टोलीले बुधबार राति करिब १२ः३६ बजे बा १४ च २९४ नम्बरको फुलबडी बोलेरो र स ६ प ४८५९ नम्बरको अपाचे मोटरसाइकल नियन्त्रणमा लिएको हो।
गणका प्रमुख सुमन जंग थापाका अनुसार दुवै सवारीसाधनमा लैजाँदै गरिएको २६ बोरा गाँजा बरामद भएको छ। नापतौल गर्दा गाँजाको कुल तौल १ हजार १०२ किलो ६५५ ग्राम अर्थात् ११ क्विन्टलभन्दा बढी रहेको जनाइएको छ।
सशस्त्र प्रहरीको मोबाइल टोलीलाई देखेपछि गाँजा ओसारपसारमा संलग्न व्यक्तिहरू सवारीसाधन र गाँजा छाडेर फरार भएको उनले बताएका छन्।
बरामद बोलेरो, मोटरसाइकल र गाँजा नं. ७ गण हेडक्वार्टर सिरहामा ल्याई आवश्यक कानुनी कारबाहीका लागि सम्बन्धित निकायमा बुझाउने प्रक्रिया भइरहेको सशस्त्र प्रहरीले जनाएको छ।
