काठमाडौँ ।गृहमन्त्री रमेश लेखकले संघीय संसदको आगामी अधिवेशनमा प्रहरी सम्बन्धी विधेयक पारित गर्ने योजना रहेको घोषणा गरेका छन्। ६९ औं प्रहरी दिवसको अवसरमा आयोजित कार्यक्रममा उनले प्रहरी ऐन २०१२ लाई प्रतिस्थापन गर्दै नयाँ विधेयक ल्याउन गृह मन्त्रालयले पहल गरेको बताए। नयाँ विधेयकले प्रहरी सेवाको सुधार, विशिष्टिकरण, र कर्मचारीहरूको हित सुनिश्चित गर्न सहयोग पुर्याउने उनले बताए।
लेखकले प्रहरी संगठनको दीर्घकालीन हितका लागि सरकारले विधेयकमा उत्कृष्ट प्रावधानहरू समावेश गरेको उल्लेख गरे। उनले प्रहरी कर्मचारीहरूको कल्याण र सेवाका लागि प्रतिबद्धता जनाउँदै विधेयक छिटो पारित गर्ने योजना रहेको बताए।
कर्तव्य पालन गर्दा मृत्युवरण गर्ने र घाइते हुने प्रहरी कर्मचारीहरूको योगदानको उच्च सम्मान गर्दै, गृहमन्त्रीले संक्रमणकालीन न्यायलाई पूर्णता दिने कानुनले सुरक्षा निकायका पीडितहरूलाई उचित सहानुभूति र सुविधा प्रदान गरेको पनि बताए। द्वन्द्वकालमा पीडित प्रहरी र तिनका परिवारहरूलाई विशेष व्यवहार गरिने प्रावधानलाई उनले जोड दिए।
सुरक्षा निकायका कमजोरीहरूले सरकार आलोचित हुने भन्दै, गृहमन्त्रीले प्रहरीले थप सतर्कता र व्यवसायिकताका साथ कार्य गर्न निर्देशन दिए। उनले महिला, बालबालिका हिंसा र भेदभाव लगायतका अपराधहरूमाथि शून्य सहनशीलता नीति लिँदै कारबाही गर्न आग्रह गरे।
नेपाल प्रहरीको २०१२ सालमा स्थापना भएको इतिहासलाई स्मरण गर्दै गृहमन्त्रीले यो संस्था नागरिकहरूको विश्वासको प्रतीक भएको र मुलुकको दिगो उन्नतिको लागि प्रहरीको भूमिकालाई सधैं सशक्त बनाउन आफू प्रतिवद्ध रहेको बताए।
