काठमाडौं ।हङकङ जारी हङकङ इन्टरनेसनल सिक्सेस प्रतियोगितामा नेपालले उत्कृष्ट प्रदर्शन जारी राख्दै अष्ट्रेलियालाई ११ रनले पराजित गर्दै क्वाटरफाइनलमा स्थान पक्का गरेको छ।
टस हारेर ब्याटिङ गरेको नेपालले २ विकेटको क्षतिमा १११ रन बनायो। कप्तान सन्दीप जोराले तुफानी पारी खेल्दै मात्र १६ बलमा ५१ रन बनाएका थिए जसमा ४ छक्का र ५ चौका समावेश थियो। यो लगातार दोस्रो खेलमा उनको अर्धशतक हो। त्यस्तै, लोकेश बमले ३३ रन बनाए भने विवेक यादव र राशिद खानले १२/१२ रनको योगदान गरे।
११२ रनको लक्ष्य पछ्याउँदै मैदानमा उत्रिएको अष्ट्रेलिया ५ विकेट गुमाएर १०० रनमै रोकियो। अष्ट्रेलियाका ज्याक उडले सर्वाधिक ५५ रन बनाए, तर बाँकी ब्याटरहरू खासै प्रभावशाली देखिएनन्। नेपालको बलिङमा प्रतीश जिसीले उत्कृष्ट प्रदर्शन गर्दै ३ विकेट हात पारे र प्लेयर अफ द म्याच घोषित भए। लोकेश बम र विवेक यादवले पनि एक/एक विकेट लिएर जित सुनिश्चित गराए।
यसअघि समूह बीको पहिलो खेलमा नेपालले इंग्ल्याण्डलाई पराजित गरेको थियो। समूहको शीर्ष स्थानमा रहँदै नेपाल क्वाटरफाइनलमा प्रवेश गरेको छ भने पराजित भए पनि अष्ट्रेलियाले पनि अन्तिम आठमा स्थान बनाएको छ।
