काठमाडौं, मंसिर ६ – खानेपानी मन्त्री प्रदीप यादवले मेलम्ची खानेपानी वितरणमा देखिएका समस्याहरूको समाधानका लागि तत्काल स्थलगत अनुगमन गर्न निर्देशन दिनुभएको छ। मेलम्चीको खानेपानी उपत्यकाका कतिपय वडामा पुग्न नसकेको र पाइपलाइन फुट्ने समस्या देखिएपछि मन्त्री यादवले यस्तो निर्देशन दिनुभएको हो।
मन्त्रालयका मातहतका निकायहरूलाई सम्बोधन गर्दै मन्त्री यादवले भन्नुभयो, “प्रत्येक वडामा पुगेर मेलम्चीको शुद्ध खानेपानी वितरण भएको छ/छैन भन्ने जानकारी लिनुहोस्। जहाँ समस्या छ, त्यहाँ स्थलगत अनुगमन गरी समाधानको उपाय तत्काल लागू गर्नुहोस्।”
मन्त्री यादवले फुटेका पाइपहरूको तत्काल मर्मत तथा प्रतिस्थापन गरी पानी वितरणमा सहजता ल्याउन निर्देशन दिनुभएको छ। “जहाँ पाइप फुटेको छ, त्यहाँ तत्काल प्राविधिक टोली खटाएर नयाँ पाइप जडान गरी पानी सञ्चालन गर्नुहोस्,” उहाँले थप्नुभयो।
खानेपानी मन्त्रालयका अनुसार नागरिकका लागि पानी जीवनका लागि अति आवश्यक चिज भएकाले मेलम्चीको पानी सकेसम्म दैनिक वितरण गर्न र नसकिने अवस्थामा एक दिन बिराएर वितरण गर्न निर्देशन दिइएको छ।
काठमाडौँ उपत्यका खानेपानी लिमिटेड (केयुकेएल) का कार्यकारी निर्देशक अशोक पौडेलले मन्त्रीको निर्देशनलाई पालना गर्दै वितरणलाई सहज बनाउने योजना रहेको बताउनुभयो। उहाँका अनुसार, “मेलम्चीको पानी दैनिक वितरण गर्न नसके एक दिन बिराएर भए पनि वितरणलाई सुनिश्चित गरिनेछ।”
मेलम्चीको खानेपानी वितरण व्यवस्थापनका लागि स्थलगत अनुगमन, पाइपलाइन मर्मत, र वितरणलाई नियमित बनाउने प्रयास तीव्र रूपमा अघि बढाइएको छ। मन्त्री यादवको निर्देशनले उपत्यकावासीलाई मेलम्चीको पानी सहज रूपमा उपलब्ध गराउने कार्यलाई गति दिन अपेक्षा गरिएको छ।
