कीर्तिपुरलाई केन्द्रविन्दु बनाएर काठमाडौंमा भूकम्पको धक्का

नेत्र दैनिक
७ मंसिर २०८१, शुक्रबार ०७:२३

काठमाडौं – बिहीबार राति १०:४६ बजे काठमाडौंको कीर्तिपुरलाई केन्द्रविन्दु बनाएर २.६ म्याग्निच्युडको भूकम्प गएको छ। राष्ट्रिय भूकम्प मापन केन्द्रका अनुसार यो भूकम्प सानो म्याग्निच्युडको भए पनि केन्द्रविन्दु नजिक भएकाले काठमाडौंसहित आसपासका जिल्लामा धक्का महसुस गरिएको छ।

भूकम्प महसुस भएपछि केही उपत्यकावासी घरबाहिर निस्किएका थिए। काठमाडौंमा धेरै समयपछि भूकम्पको धक्का महसुस हुँदा मानिसहरू २०७२ सालको गोरखा भूकम्पको त्रासदीलाई सम्झिन पुगेका छन्।

यसअघि बिहीबार बिहान कास्की र मनाङको सिमानामा ४.२ म्याग्निच्युडको भूकम्प गएको थियो। भूकम्पको पुनः आवृत्तिले उपत्यकावासीलाई सतर्कता अपनाउन प्रेरित गरेको छ।

विशेषज्ञहरूले साना म्याग्निच्युडका भूकम्पहरू ठूला भूकम्पको सम्भावनालाई कम गर्न मद्दत गर्ने बताएका छन्, तर सतर्कता भने जारी राख्नुपर्ने चेतावनी दिएका छन्।